Díli-SMI: Primeiru Ministru, Kay Rala Xanana Gusmão, husu ba joven sira ne’ebé dadaun hala’o hela atividade iha kapitál Díli hodi fila fali ba ninia munisípiu wainhira tama ba komemorasaun loron konsulta popular ba dala-25, tinan ida-ne’e.
“Ho respite tomak ha’u husu ba hotu-hotu mai ita konsentra bai ha preparasaun selebrasaun loron 30 Agostu, loron konsulta popular. Joven sira ne’ebé mak mai hosi munisipiu no agora iha Díli, husu atu fila ba imi nia postu administrativu, hamutuk ho imi nian inan-aman sira”, dehan, Primeiru Ministru, Xanana Gusmão, iha Palasiu Prezidensial Aitarak-Laran, hafoin hasoru malu ho Prezidente Repúblika, Jose Ramos Horta, semana kotuk liu-ba.
Apela ba joven sira atu ida-idak fila ba ninia Postu Administrativu ne’e ho objetivu atu bele joven sira rona direta istória inan-aman sira nia luta nian durante no depois konsulta popular iha tinan 1999.
“Sira sei konta istória ho tanis no imi sei hamoos sira nia mata-been. Imi mós tenke kompremete ba sira hodi sai ema di’ak atu kaer metin sira nia mehi ba ukun-rasik an nian ne’e”, Xanana, katak.
Tuir planu IX Governu katak komemora loron konsulta popular ba dala-25 ne’e sei selebara iha munisípiu no Postu Administrativu sira hotu iha Timor laran tomak.
“Komemorasaun loron importante ne’e membru Governu hotu-hotu sei ba to’o iha munisípiu no Postu Administrativu hotu-hotu iha Timor laran tomak”, tenik, eis Prezidente Repúblika no atual Xefe IX Governu ne’e.
Loron konsulta popular ne’e ninia signifikadu boot tebes ba povu tomak tanba iha loron 30 Agostu 1999 deside sira nia hakarak ba ukun rasik an. Povu terus no mate barak durante luta tinan 24 nian laran.
Povu la’os terus no mate durante funu maibe fatin barak povu mate, iha duni fatin votasaun ema tiru no mate, sira sei konta bá joven sira atu bele hatene istória importante ne’e, bele kompriende terus, susar no sakrifisiu bá determinasuan hosi inan aman sira nian.
Tan-ne’e, lider Governu ne’e husu ba jerasaun foun sira atu hakribi violensia hodi harii paz no estabilidade para bele kontribui ba dezenvolvimentu nasaun nian.
“Husu ba joven sira atu labele komete (halo) violénsia iha (ita) nia rai ne’ebé moris ona ho livre ne’e”, Xanana, enkoraja. (Editór, Guido Santos).
