Estrada Publiku sira iha kapital Dili inklui iha munisipius seidauk asesivel no la favoravel ba ema Timoroan ne’ebe moris ho kondisuan defisiensia.
“Estrada publiku la ajuda tebes ema ho defisiensia, tanba laiha sinais trafiku ne’ebe iha lian atu nune’e sira ne’ebe la ho matan bele rona lian hodi sira bele korta ba mai,” hateten Diretor Asosiasaun Defisiente Timor-Leste (ADTL),João Pequinho iha fatin, iha Dili.
Alende ne’e, nia dehan trotoar mos aat tebes, laiha espasu atu ema ho kondisuan defisiensia (ain aat) bele liu ho kadeira roda.
“Labele asesu tanba la seguru, trotoar miring tun-sa’e maka’as liu no la ajuda defisiente sira ne’ebe mak ho kadeira roda liu,” nia hateten.
Tanba ne’e nia husu ba ministerio relevante, tenke iha dezenu ida ne’ebe inklusivu hodi fo garante ba ema ho defisiensia bele asesu ho diak fasilidade publiku ne’ebe iha.
Entretanto Prezidente Conselho Nasional Joventude Timor-Leste Maria Dadi Magno hateten buat hotu ne’e espasu publiku ne’e duni responsabilidade politika governo nian tenke kria kondisoens importante ne’e.
“Ezemplu bainhira ema ho defisiensia labele asesu ba estrada publiku no trotoar ne’ebe la asesivel ba sira atu halo movimento ba atividade lor-loron nian,” nia hateten.
Tanba ne’e governu tenke iha plano ne’ebe integradu no ne’ebe hateke mos ba ema ho defisiensia, tanba sira labele asesu ba iha estrada publiku no trotoar hanesan ema bain-bain.
“Husu ba orgaun soberania ezekutivu sira, ne’ebe mesak matenek, iha meritu atu iha planu tenke implementa no aplika plano ne’e ba realidade no iha programa ne’ebe integrado no hateke mos ba ema ho defisiensia sira,” nia hateten.
Iha parte seluk Xefe Departamento Promocão e Protesaun Direito dos Defisientes Ministerio Solidaridade Sosial (MSS) Antonio Noronha hateten estrada publiku ladun iha asesibilidade ba defisiente sira no ida ne’e sai preokupasaun bo’ot ba entidade hotu.
Nia hatete tan katak politika nasional Promocão e Protesaun Direito dos Defisientes bazeia ba Rezulusaun Konsello Ministros No 14/2012 ne’ebe kria ona politika ida ne’e, inklui mos estratejia politika relasiona ho direitu asessibilidade ba ema ho defisiensia.
“Karik kria konstrusaun ruma presiza fo atensaun ba asessibilidade ba ema defisiente sira,” nia hateten.
Nia hatutan, sira halo ona linha koordenasaun ho Diresaun Nasional Transporte e Terrestre (DNTT) no sira iha plano atu halo ho meus oinsa defisientes uza kadeira roda sira bele liu no bele halo movimento ba mai ho livre.“Governo no sosiedade sivil sira sei koopera hamutuk hodi ejiji nafatin oinsa bele fo atensaun ba iha estrada publiku no trotoar, atu nune’e ema ho defisiente bele asesu ba,” nia hateten.
Kona-ba sinais tranzito sira, nia sujere tenke fo netik sinal ruma ba ema ho defisiensia matan a’at atu sira bele ultrapasa liu husi linha zebra cross ne’ebe iha.“Liu husi Ministerio Solidaridade Sosial nafatin iha komitmento bo’ot atu fo prioridade ba asunto sira hanesan ne’e, atu bele fasilita ita nia maluk sira ne’ebe ho defisiensia,”nia hatutan.
