Organizasaun feto CAUCUS (Feto iha Politika) dezkontente ho lideransa partidu politiku sira ne’ebe la fo oportunidade ba feto atu kompete iha estruktura meza parlamentu nasional ne’ebe domina husi mane.
Diretora CAUCUS Paula Corte Real hateten iha feto nain tolu ne’ebe tur iha estruktura meza parlamentu hanesan sekretaria no vice sekretaria, maibe iha presidente no vice presiente mane hotu.
Nia dehan iha eventu barbarak lideransa sira hato’o kompromisio promove igualidade jeneru iha Timor–Leste, maibe la tau iha asaun, realidade vice presidente rua ne’e mane hotu feto nain tolu para hotu iha sekretaria.
“Ita triste oituan tanba ita nia lideransa sira mos sei nafatin forte ho kultura ida ne’ebe la tau fiar ba feto sira atu tur iha posisaun sira ne’ebe foti desizaun,” nia hateten iha servisu fatin Caicoli Dili.
Nia hatutan organizasaun feto sira la dehan sekretaria ne’e ladiak, maibe problema pozisaun altu fatin iha no feto potensial barak liu–liu deputada balun ne’ebe tur iha parlamentu periodu tolu ona la fo oportunidade ba feto atu kompete.
Nia prekupa ho realidade ida ne’e tanba organizasaun feto sira servisu makas hodi hakbi’it, enkoraja no motiva feto sira assume responsabilidade sira nivel alto, maibe laiha oportunidade.
Nia dehan situasaun ne’e fo motivasaun ba organizasaun feto sira atu servisu makas iha parte advokasia iha nivel altu hodi konsidera asuntu jeneru ne’e laos deit problema feto nian maibe konaba balansu oportunidade.
Nia hateten dalan seluk ne’ebe deputada sira tenke halo mak proativu iha bankada no komisaun sira atu bele halo influensia ba iha orsamentu jeral do estado no programa governu nian iha plenaria hodi asegura programa sira ne’e fo benefisio ba ema hotu liu–liu feto no labarik sira.
Estruktura meza parlamentu kompostu husi presidente deputado Aniceto Guterres husi bankada FRETLIN, vice presidente nain rua mak deputado Julio Sarmento husi bankada PD no deputado Antonio Verdial husi bankada KHUNTO. Nun’ee mos sekretaria deputada Lidia Norberta husi bankada FRETLIN no Vice sekretaria nain rua mak deputada Angelica da Costa husi bankada FRETLIN no deputada Elvina Sousa Carvalho husi bankada PD.
Prosesu hili struktura meza parlamentu ne’e liu husi elisaun sekreta ne’ebe partisipa husi membru deputado 65 ne’ebe kompostu husi feto nain 23 no mane 42.
Estruktura meza parlamentu iha periodu 2007-2012 feto ida assume kargu hanesan vice presidente mak eis deputada Maria Paixão atual embaixadora Timor–Leste ba Portugal, maibe periodu sira tuir mai laiha feto.
Iha parte seluk, deputada bankada PD Elvina Sousa hateten ne’e mak realidade ne’ebe iha, maibe sira sei esforsu atu bele involve ativu liu tan iha prosesu diskusaun sira iha bankada, plenaria no komisaun sira ne’ebe sei estabelese.
Nia dehan lista kandidatura ne’ebe partidu sira aprezenta ne’e uniku no kargu vice ne’e mane hotu ne’ebe hetan ona nia legitimidade iha plenaria liu husi elisaun sekreta.
“Hau komprende prekupasaun husi organizasaun feto sira nian, maibe ita hare ba numeru iha balansu so ke kargu sira alto ne’e mak feto laiha,” nia hateten.
Nia hatutan estruktura meza parlamentu ne’e servisu ekipa ba prosesu sira inklui desizaun politika sira ne’ebe halo iha parlamentu.
