Funsionario Publiku husi instituisaun estado publiku nain 56 hetan promosaun kareera husi Komisaun Funsaun Publika (KFP) tanba sira iha dezempenhamentu no prestasaun servisu ne’ebe diak ba publiku.
Funsionario publiku sira ne’e mai husi Ministerio Saude nian 48, Ministerio Interior nain 5, Ministerio Estado Asuntu Sosial nain rua no Sekretario Estado Apoiu Sosio-Ekonomia Feto (SEM) nain ida. Funsionario sira ne’e hetan promosaun ba iha nivel tekniku superior grau B, tekniku professional grau C, tekniku professional grau D no tekniku administrasaun grau E.
Sekretario Ezekutivu KFP, Maria Sarmento hateten kada tinan rua funsaun publika halo avaliasaun ba funsionario publiku ne’ebe iha prestasaun diak hodi hasa’e sira nia nivel kareera professional.
Nia dehan, funsionario sira ne’e merese hetan promosaun ba sira nia meritu tanba sira kontribui ona ba servisu diak lubuk ida ba komunidade.
“Komisaun nafatin hateten ba sira katak ida ne’e seidauk to’o, presiza atu hasa’e tan liu–liu konesementu atu hadia mos kareera, tanba kareera mak ita nia direitu,” nia hateten iha salaun Ministerio Saude, Dili.
Iha mos kriteriu, mak nia dehan funsionario publiku sira tenke hetan avaliasaun dezempenhu husi instituisaun ho pontuasaun minimu muito bom dala rua tinan rua tutuir malu, tanba atu halo aplikasaun ba promosaun funsionario sira tenke hatama rezultado avaliasaun.
Alende ne’e, nia hateten komisaun mos halo avaliasaun ba sira nia antigu servisu, prestasaun servisu lor-loron, konesementu no nivel formasaun tanba asuntu hirak ne’e mak bele ajuda hadia sira nia kareera ba futuru.
Kona ba direitu ba salariu, nia la temi pursentu hira mak funsionario sira sei hetan husi sira nia salariu, maibe funsaun publika iha tabela salariu rua hanesan horizontal ne’e manan tuir avaliasaun dezempenhu no vertikal ne’e promosaun katak husi nivel ida hakat ba nivel aas tan.
Entretantu Diretor Jeral Ministerio Saude, Jose Magno husu funsionario sira atu kaer metin nafatin prinsipio interese publiku atu servi povu diak liu tan, liu –liu iha asistensia servisu prestasaun saude.
“Ita tenke sai nain ba prosesu dezenvolvimentu setor saude, nune’e loron ida ita bele alkansa vizaun Ministerio Saude nian mak ema saudavel, iha Timor –Leste ne’ebe saudavel mos,” nia hateten.
Nia husu, atu sai nafatin funsionario ne’ebe examplar no ezemplu ba iha funsionario sira seluk hodi bele hadia kualidade servisu publiku.
Iha parte seluk, Funsionario Antonio Domingos Moreira agradese tanba komisaun rekonese sira nia servisu liu husi halo promosaun, tanba sira hein prosesu ne’e kleur ona.
Nia dehan, hanesan jestor servisu ne’ebe sira halo mak estabelese politika no programas ba area saude nian hodi eleva konesementu professional saude sira nian.
“Sei servisu diak liu tan atu fo prestasaun ne’ebe diak no kualidade ba iha povu, atu povu bele sente asistensia sira ne’e,” nia promete.
Portantu, tuir peskiza Komisaun Funsaun Publika tinan 2017 kona ba persepsaun publiku hatudu katak kualidade servisu publiku seidauk aas tuir vizaun ne’ebe iha tanba povu sei halerik ba bee moos, eletrisidade, asistensia saude, edukasaun kualidade no seluk tan.