Dili, Sentru Mídia Investigativu oferese formasaun jornalizmu investigativu báziku ba foinsa’e feto-mane hamutuk ema na’in 39 ne’ebé hakarak sai jornalista investigativu iha futuru.
Lia hirak ne’e hato’o husi Gestór Formasaun SMI, Mateus Barros foin lalais ne’e iha Taibesi, Dili.
Gestór ne’e esplika katak formasaun ne’e nu’udar inisiativa husi membru fundador SMI atu fo oportunidade ba timoroan sira ne’ebé hakarak sai jornalista. Ho nune’e, SMI deside loke rejistrasaun etapa primeiru iha loron 22 fulan Agostu to’o 15 Setembru 2017.
Membru fundador ne’e mos esplika katak durasaun formasaun durante fulan tolu ne’ebé hanesan fulan ida kandidatu jornalista apriende teoria jornalizmu kona-ba TV, Rádiu, Jornál no Online.
“Formasaun ne’e hahu 22 setembru agora dadaun faze teoria durante fulan ida iha no fulan ida pratika materia ne’ebe durante sira hetan iha aula. No, sei haruka ba instituisaun mídia hodi halo magan durante fulan ida”, tenik Barros
Formador ba jornalizmu investigativu ne’e mai husi fundador no konselleru sira ne’ebé ho esprensia jornalizmu tinan 10 ba leten iha area oi-oin hanesan jornalista TV, Rádiu, Imprime no Online nian.
Iha parte seluk, Asistente finansa SMI, Natalina Ribeiro haktuir katak maizumenus ema na’in 42 maka halo rejistrasaun maibe ema na’in tolu maka la kontinua formasaun tanba okupadu ho sira nia atividade estudu iha Universidade.
“Hamutuk ema na’in 42 halo ne’ebe mak mai rejistu, no sira ne’ebé maka aktivu hodi tuir prosesu formasaun hamutuk ema na’in 39 ne’ebé kompostu feto 19 no mane ema na’in 20”, katak Ribeiro.
Osan registrasaun ne’ebé SMI oferese maka $.15.00 USD kada ema ida ne’ebé fahe osan kamizola, ID Card nomós administrasaun nian. Orsan formasaun kada fulan ho valor $.40.00 USD. (Nico/SMI).