Dili – SMI, Kandidatu jornalista investigativu hamutuk ema na’in 28 ne’ebé remata ona kursu intensivu durante fulan tolu iha Sentru Mídia Investigativu – SMI dadaun ne’e iha prosesu estajiu jornalístiku iha kanál mídia sira no instituisaun Estadu iha kapital Dili.
“Distribuisaun formandu sira ba mídia sira maka hanesan RTTL, Rádiu Liberdade, Diariu Timoroman, RTM, TVE-T, SMI no Radio no Comunidade Comoro. Totál formandu ne’ebé tuir estajiu hamutuk na’in rua nulu resin ualu (28), feto hamutuk na’in 14 no mane na’in 14”, esplika Jestór Formasaun SMI, Mateus Barros, iha nia serbisu fatin, Taibesi, Dili, (Kuarta, 17/01).
Mateus esplika katak kandidatu sira ne’e hahu formasaun iha loron 22 fulan Setembru 2017 teória no prátika ba jornalizmu investigativu báziku iha televizaun, rádiu, online no jornál nian.
Eis jornalista Centru Jornalista Investigativu Timor Leste – CJITL ne’e mós esplika katak objetivu prinsipal husi estajiu ne’e atu bele apriende diak liu tan oinsa halo serbisu jornalístiku iha terenu.
“Objetivu husi estajiu ne’e atu kapasita diak liu tan formandu sira ba kampu prátika hodi haree besik liu serbisu jornalista nian iha instituisaun sira ne’ebé sira estajiu bá, atu aumenta sira nia kuiñesimentu no kapasidade jornalístiku”, Tenik Barros
Iha parte seluk, Leopoldina Leca nu’udar formandu jornalista investigativu ne’ebé dadaun ne’e halo estajiu iha RTL agradese ba SMI tanba bele halo prátika direta serbisu jornalista iha terenu.
“Estagio diak, Hau sa kontenti los”, dehan Leca ba liu husi messenger ne’ebé diriji ba dirasaun SMI, Kuarta, (17/01).
Leca uza programa "Cool Edit Pro" hodi edita notisia iha fatin estajiu RTL. Foto. Leca
Leca mós esplika katak hahu halo estajiu iha RTL apriende ona buat barak hanesan lor-loron halo kobertura no hakerek notisia ba rádiu, no apriende oinsa koa audio ho programa “cool edit pro”.
“Ba halo kobertura mai hakerek mesak notisia radio. Agora apriende hela koa voice, editing audio ho cool edit pro”, dehan nia.
Nia senti kontente tanba durante semana ida resin halo estajiu iha RTL maibe ninia produtu jornalístiku hamutuk tolu maka públika ona iha kanál RTTL.
Formandu hamutuk ema na’in 28 ne’e sei remata sira nia estajiu iha fulan Fevereiru tinan ida ne’e.
We use cookies to ensure that we give you the best experience on our website.
