MT Avalia Serbisu Funsionáriu Temporariu Na’in 125
Dili-SMI, Hodi hadi’a kualidade serbisu no transparansia serbisu funsionariu, Ministeriu Turizmu dadaun ne’e halo hela avaliasaun rigrozu ba funsionariu temporariu hamutuk ema na’in 125 ne’ebé diriji diretamente husi Ministru Turizmu Manuel Vong ho ninia Vise Ministru Rui Menezes.
“Hau ho Vise Ministru Turizmu Dr. Rui Meneses hamutuk ho DG, Dir. Nasionál ho Ekipa MT hala’o avaliasaun no verifikasaun liu husi entrevista ba Belun funsionariu temporaria na’in 125 ne’ebé balun servisu tinan 10 resin ona desde 2004 no balun hahu husi Marsu 2017”, dehan Ministru Turizmu Manuel Vong ne’ebé públika iha ninia Facebook privadu, Kuarta, (17/01).
Vong esplika katak objetivu husi avaliasaun ka verifikasuan ba funsionariu sira ne’e atu identifika kapasidade, kompetensia, kuiñesementu no atetude funsionariu ida-idak nian ho kritéria espesifiku 5 ne’ebé MT iha.
“Objetivu mak, atu hatene los no lolos belun sira ne’e ida-idak nia kompetensia iha konhesimentu, abilidade ka skill no attitude sira nia. Kriteriu 5 uza hodi halo iha entrevista ne’e mak: 1. Habelitasaun Literaria; 2. Antiguidade ka experiencia servisu; 3. Professionalismu ka abilidade; 4. Komplexidade no risku servisu; no 5. Meritu saida mk halo ona”, dehan Eis Reitor Dili Institute of Technology - DIT
Razaun seluk husi avaliasaun ne’e maka atu bele valoriza funsiornariu ida-idak nia hodi garante kualidade serbisu iha MT hodi serbi povu no nasaun.
“Hau hanoin, hadomi no hakarak tebes haree hau Belun Funcionariu Ministeriu Turismu hotu hamnasa, haksolok, hadomi malu hanesan nia aan rasik, sente buat nebe nia maluk sente, kreativu no inovador iha knaar ne’ebé nia simu”, esplika nia iha pajina Facebook
Nia hakerek mós katak hamutuk ninia vise ho funsionariu tomak sei halo serbisu ho ekipa, transparansia no akutabilidade iha prosesu ezekusaun orsamentu Duodesimo.
“Ho Vise Ministru Turismu Dr Rui Meneses hamutuk ho Belun Funcionariu hotu halo komprimisiu atu servisu iha ekipa, transparansia (nakloke maibe labele loke aan), akuntavel (fiar ne’ebé fó tenki fo fila fali ba fiar nia hun no prontu atu esklarese buat ne’ebé nia halo), efisiense, efikásia no integridade ho osan Duodesimu 2017 ne’ebé iha MT”, tenik nia iha FB.
Atu taka nia hakerek iha pajina facebook, nia apela ba públiku atu hamutuk hodi harii no dezenvolve area turizmu iha nasaun Timor-Leste hodi nune’e bele dezenvolve diak liu tan iha futuru.
“Mai ita hamutuk hatutan, harii, hadia, hametin dezenvolvimentu turismu sustentavel iha aspetu ekonomiku, kultural, sosial, ekolojiku, politiku, partisipasaun komunidade no satisfasaun turista hodi fo kria kampu servisu no fo moris diak ba povu tomak Timor-Leste”, katak nia.
