Dili-SMI, Emprezariu no Prezidente Kamára Komersiu Industria Timor-Leste – KKI-TL, Oscar Lima senti preokupa ho situasaun politika iha rai-laran ne’ebé to’o agora seidauk iha solusaun.
Ho nune’e, husu ba Prezidente Republika Francisco Guterres “Lu-Olo” hodi solusiona lalais situasaun polítika iha rai-laran atu labele fo impaktu ba emprezariu timoroan sira.
“Enkontru ho prezidente ne’e para atu buka solusaun lalais liu para labele difikulta vida emprezariu sira nian”, dehan Oscar Lima, depois hasoru malu ho PR iha Palasiu Aitarak Laran, Segunda, (15/01).
Oscar mós hatutan katak prinsipiu fundamentu husi sorumutu ho PR ne’e ligasaun ho problema sira ne’ebé emprezariu sira dadaun infrenta. Tanba ne’e husu PR atu buka solusaun lalais ba situasaun politika iha rai-laran hodi bele garantia moris povu, liliu traballador sira.
“Ami nia prinsipiu maka mai para atu buka solusaun ba situasaun atual, halo nusa mak sira fo solusaun ba situasaun atual ida diak liu tan. Tanba hanesan ne’e afeta ba ema nia moris lor-loron tanba ami iha buat ne’ebé maka iha ligasaun ho traballador no emprezariu”, katak emprezariu ne’e.
Tanba tuir nia katak situasaun politika kontinua la’o hanesan ne’e bele afeta ba estadu nomós traballador sira maka bele mosu krize ekonomika iha rai-laran.
