Dili-SMI, Governu Australia liu husi Ministériu Agrikultura no Peskas sei fó apoiu Karau timor hamutuk sanulu (10) ba governu Timor-Leste hodi haforsa susu been karau iha rai laran.
“Governu Australia sei apoiu karau timor ba governu Timor-Leste atu nune’e bele haforsa diak liu tan susun been iha Timor-Leste”, Dehan Ministru Agrikultura no Peskas, Estanislau Aleixo da Silva, hafoin hasoru malu ho Primeiru Ministru Mari Alkatiri, iha Palasiu Governu, Tersa, (16/01).
Eis membru Parlamentu Nasional ne’e mós esplika katak karau hirak ne’ebé Australia fo apoiu ba governu Timor-Leste nu’udar animal rasa foun ne’ebé dezenvolve iha Australia no karau hirak ne’e bele produz susu been liu litru sanolu kada loron.
Nia mós klarifika katak karau hirak ne’ebé governu Australia apoiu ne’e gratuita, no Governu selu deit transporte hodi tula karau hirak ne’e mai Timor-Leste. Nune’e mós nia hatutan katak Governu presiza prepara fatin ida ne’ebé seguru no saudavel hodi bele seguru no isin diak nafatin.
“Ministro Agrikultura haree hela fatin atu tau karau hirak ne’e tamba karau hirak ne’e resistente presiza iha fatin ne’ebé seguru no saudavel. No, karau hirak ne’e diferente ho ita nia karau iha timor leste no karau hirak nee la’os atu fahe ba populasaun”, dehan Estanislau.
Tuir nia esplikasaun katak karau husi Australia ne’e la fasil fo hada’et moras ba animal seluk, ne’e duni antes lori mai presiza halo melloramentu, inseminasaun no artifisial hodi labele fo impaktu karau timor iha rai-laran.
