Dili – SMI, Sekretariu Estadu Konsellu Ministru no Komunikasaun Sosiál – SEKOMS dezafia jornalista timoroan hodi kontinua atu hariku an liu husi formasaun jornalizmu hodi nune’e fo sai informasaun ho kualidade ba públiku.
“Ha’u dezafia maun alin sira jornalista tenki hariku an ho kuiñesimentu naton, domina topiku sira para ke ita bele halo intervista no provoka fonte sira ho kestaun sira ne’ebé maka ita atu husu ho notisia ne’ebé kualidade”, Dehan Sekretariu Estadu Komunikasaun Sosiál Matias Boavida wainhira halo iha nia intervensaun iha lansamentu programa treinamentu jornalismu komprensimu media iha siklu eleitoral Timor-Leste ne’ebé realiza husi Konsellu Impressa ho UNDP, iha Salaun Maubara-Timor Plaza, Kinta, (18/01).
Eis dosente UNTL ne’e, fo enkoraja ba jornalista timoroan atu kontinua tuir formasaun barak atu hodi nune’e bele fó informasaun ne’ebé kualidade ba públiku.
Sekretariu Estadu ne’e mós dezeja servisu Conselho Imprensa nian maske ho tempu mandatu ne’ebé limitadu maibe ho esforsu tomak bele halo koperasaun ho parte hotu liu-liu UNDP no Governu Japaun hodi fornese treinamentu intensive ne’ebé atu hasa’e kapasidade jornalista ne’ebé hanoin kritiku.
Seremonia lasamentu ne’e partisipa husi jornalista sira, mídia na’in nomós entidade Governu nian ne’ebé sei involve iha formasaun jornalizmu ne’e.