Dili – SMI, Durante abertura lansamentu programa formasaun jornalizmu kompriensivu ne’ebé organiza husi Conselho Imprensa – CI no UNDP iha Timor-Leste, Sekretariu Estadu Komunikasaun Sosiál – SEKOMS, Matias Boavida halo kritika ba CI no UNDP ne’ebé la displina ba tempu.
Matias Boavida esplika katak nu’udar SEKOMS kumpri ona dever hodi partisipa seremonia lasamentu programa formasaun jornalizmu kompriensivu ho pontualidade maibe parte Conselho Imprensa no UNDP ne’ebé nu’udar autor ba programa refere to’o tarde iha fatin seremonia.
“Hanesan Sekretariu Estadu Komunikasaun Sosiál hau tenta hatan ordem, isto e como nove meia hau sai husi hau nia fatin nove meia, por equanto ate aqui encima de hora, infelizmente Presidente Conselho Imprensa segundu depois de Nove meia. I pior liu tan UNDP”, dehan Matias wainhira fo ninia palestra iha seremonia lansamentu programa formasaun kompriensivu mídia iha Salaun Maubara – Plaza, Kinta, (18/01).
Eis Dosente Universidade Nasional Timor Lorosa’e – UNTL ne’e mós fo kritika ba reprezentante embasada Japaun, Xefi Seksaun Asistensia Ekonomia no Dezenvolvimentu, Sra. Mizuho Fujimura ho Vise Ministru Komersiu, Dr. Jacinto Barros Gusmão ne’ebé mós to’o tarde.
“At liu tan husi Governu JICA to’o mai ita atu hahu, pior liu hau nia kolega membru Governu”, katak Matias ho oin hamnasa ne’ebé halo pastisipante sira hamnasa hahaek.
Nia dehan displina ba tempu nu’udar aspeitu importante tanba ne’e nia koko hodi sempre prezensa iha fatin serbisu ka atividade sira ho pontualidade.
“Simplesmente hau hakarak kumpri komprimisiu ne’ebé hau iha hodi sai ezemplu ne’ebé diak ho situasaun hodi hatan ba buat hot-hotu tuir oras ne’ebé iha, Andreas Castilo kuiñese hau wainhira ami iha UN wainhira ami serbisu hamutuk buat hothotu tuir oras”, nia koko relembra fali ba partisipante sira kona-ba ninia disiplina serbisu iha tempu UN nian.
Antes remata nia dehan observasaun ne’e hanesan atensaun ida ba membru Governu no públiku no jornalista sira atu fó konsiderasaun ba tempu hanesan ema japonesa sira.