Dili – SMI, Prosesu finaliza konstrusaun edifísiu foun Komisaun Funsaun Públiku – KFP lori tempu naruk maizumenus tinan 7 nia laran, hahu husi tinan 2010 to'o 2018 ne’e gasta ona Orsamentu Jerál Estadu – OJE hamutuk 5 milloens.
“Orsamentu ba obra ne’e fahe ba etapa rua, iha etapa primeiru por volta de miliaun tolu atus tolu resin (U$ 3,300) no iha segunda etapamiliaun ida atus lima resin ( U$1,500), ho totál orasamentu ba obra ne’e hamutuk cinco miloens ital”, dehan Prezidente KFP, Faustino Cardoso hafoin hasoru malu ho Primeiru Ministru Mari Bin Amude Alkatiri, iha Palasiu Governu, Kinta, (18/01).
Faustino esplika katak prosesu konstrusaun edifísiu ne’e hahu iha tinan 2010 ne’ebé kaer husi Timor Leste Independent Company - TLINC maibe labele finaliza lalais tanba prosesu konstrusaun paradu iha tinan 2014.
“Prosesu konstrusaun porvolta tinan hitu (7) tamba obra ne’e hahu konstrui iha 2010 no finaliza 2017. Rehablitasaun ne’e kaer husi kompanha Timor Leste Independent Kompany (TLINK) lidera husi Francisco Belo maibé to’o 2014 prosesu konstrusaun paradu tiha tamba razaun orsan laiha maske estado selu ona osan ba sira”, Esplika Eis Prezidente CNE ne’e.
Nia mós kontinua informa katak maske paradu maibe obra ne’e ninia prosesu konstrusaun kontinua iha tinan 2015 ne’ebé kaer husi kompañia Timor Karya ne’ebé prosesu konstrusaun atinji ona 99,9%, no tuir planu sei inagura iha kurta feira (24/01) semana oin.
Tuir planu tempu inagurasaun ne’e KFP sei fahe mós premíu ba funsionari sira.