Dili- SMI, Sentru Mídia Investigativu – SMI dadaun ne’e hahu fali ona formasaun jornalizmu investigativu ba etapa segundu ne’ebé partisipa husi kandidatu sira hamutuk ema na’in 44 kompostu husi feto ema na’in 22 no mane hamutuk ema na’in 22.
“Formasaun ne’e agora dadaun ba etapa daruak no kandidatus jornalista investigativu hirak ne’e hamutuk hat nulu resin hat (44). Agora dau-daun totál kandidatu feto hamutuk 22 pesoas no mane 22 pesoas”, dehan Jestór Formasaun SMI, Mateus Barros iha nia serbisu fatin Taibesi, Segunda, (22/01).
Jestór formasaun ne’e mós esplika katak formasaun jornalizmu investigativu ne’e iha area importante lima maka hanesan jornalizmu bázku rádiu, televizaun, jornál, online nomós cameraman nian.
Eis jornalista Centru Jornalista Investigativu Timor Leste – CJITL ne’e mós dehan katak programa formasaun ne’e iha etapa rua maka teoria fulan ida no prátika fulan ida, depois kontinua magan jornalístiku iha instituisaun mídia privadu no públiku iha rai-laran.
“Formasaun ne’e durante fulan tolu inklui ona ho estajiu servisu sosiál iha instituisaun mídia sira inklui mós iha instituisaun Governu sira ne’ebé relevante ho mídia’, tenki Barros.
Nia hatutan katak durante formasaun sei hetan prátika espesifiku hanesan halo shooting filmajen no edit video, edit audio nomós oinsa hakerek notisia ba rádiu, televizaun, online no jornál nian.
Iha fatin hanesan kandiadtu jornalista investigativu Rofino Seixas katak tuir formasaun jornalizmu hodi bele aumenta kapasidade hodi dezenvolve nasaun no povu Timor-Leste.
Nune’e mós kandidatu seluk hanesan Eva Ana Paula katak senti kontente tanba bele apriende jornalizmu hodi nune’e bele sai hanesan matan no tilun povu nia, hodi transmite informasaun ba públiku no ba mundu tomak.
Tuir ajenda formasaun hahu ohin (22/01) no sei remata iha fulan Abril tinan ida ne’e.