Likisa – SMI, Komandu Polisia Nasional Timor Leste – PNTL munisipiu Likisa fo pose ba membru Konsellu Polisiamentu Komunitaria – KPK hamutuk ema na’in 25 hodi bele prevene aktu ka violensia iha munisipiu refere.
“Fo pose ba membru Konsellu Polisiamentu Komunitaria (KPK) hamutuk rua nulu resin lima (25) ho objetivu atu bele prevene krime iha Munisipiu Likisa”, Dehan Adjuntu Komandante PNTL Munisipiu Likisa, Superintendente Eduardo Campos iha Suku Vatuboro, kinta, (18/01).
Eduardo esklarese katak ho establesementu KPK ne’e bele ajuda hakman serbisu polisia hodi kontribui ba paz no estabilidade iha Likisa.
Adjuntu Komadante ne’e husu ba membru KPK ne’ebé hetan tomada de pose hodi ho espiritu voluntariu ho fuan no laran atu nune’e bele kontribui ba dezenvovlimentu siguransa iha munisipiu Likisa.
Parte seluk, Fernando Araújo reprezentante ONG Belun apresia ba inisiativa PNTL hodi establese KPK iha suku Vatuboru hodi bele kontribui ba paz no establidade iha povu nia leet.
Reprezentante NGO Belun ne’e promote hodi fornese formasaun ba membru KPK atu bele ajuda sira nia kuiñesementu kona-ba prevensaun krime iha suku laran.
‘’Ami loke ona nomós kontinua fo formasaun fila fali ne’ebé maka estabelese an ona, atu nune’e bele fo apoiu ona servisu polisia nian iha baze atu asegura problema ki’ik sira ne’ebé maka mosu ba iha krime karik KPK sira bele halo ona prevensaun.’’tenik nia
Biban hanesan Xefi Suku Vatuboro, Julito dos Santos mós apresiza ba inisiativa estabelesementu KPK iha ninia suku tanba bele ajuda Konsellu Suku hodi hadi’a diak liu tanba prosesu prevensaun krime iha area refere.