Dili-SMI, Ajente foun instituisaun Polisia Nasional Timor Leste - PNTL hamutuk ema na’ain 178 ofisiálmente simu ona graduasaun atu reforsa instituisaun hodi serbi povu no nasaun.
Komandu Jerál PNTL, Komisariu Julio Hornai esplika katak seremonia graduasaun ba membru foun instituisaun PNTL ne’e ba dala lima durante Timor-Leste hetan ninia independensia. No graduadu hirak ne’e tuir kursu polisiál durante fulan 6 iha akademia polisia komoro.
“Sira ne’ebé maka ohin termina ona sira nia kursu ka simu graduasaun ne’e ho nia signifikadu atu aumenta tan ba efetivu iha instituisaun PNTL hafoin periodu fulan ne’en (6), formasaun ida que forte, sermonia graduasaun ida ne’e ba dala lima (5) ona”, dehan Komisariu Julio Da Costa Hornai liu husi dikursu iha seremonia gradusaun iha Akademia Komoro, Segunda, (22/01).
Julio konsidera katak graduasaun ne’e importante tebes ba instituisaun PNTL tanba timoroan sira hakarak simu konsekuiñsia hodi hili dalan sai membru polisia atu serbi nasaun no povu iha rai ida ne’e.
Ho nune’e, eis Komandante Formasaun Akademia Polisia ne’e husu graduadu sira atu kompri regra no kaer metin prinsipiu juramentu hodi nune’e ezekuta lei no orden ho profisionál
Husu ba graduantes sira atu kaer metin juramentu ne’ebé iha, tau odi no vigansa sira ba kotuk, bainhira hala’o kna’ar iha terenu tenki hatudu ho profisionál, disciplina no dignu tamba polisia mak sai hanesan instituisaun ka lutu ba nasaun hodi servi rai doben Timor-Leste”, tenik nia.
Helio Da Silva Afonso nu’udar kadetes foun ne’ebé hetan klasifikasaun diak durante iha formasaun hateten sente kontente tamba liu husi prosesu naruk maibé ikus mai konsege gradua nu’udar polisia tamba ne’e kompromete sei tau ás interese povu no nasaun.
“Senti kontente tebes no orgullu boot ida mai hau no familia tomak ne’ebé fo suporta mai hau lori ami hotu nia esforsu an ho atividade ne’e too remata ohin. Ami iha servi no protéje povu Timor-Leste , ami sei tau as interese nasaun duke privadu”, Helio komenta.
Seremonia graduasaun ne’e partisipa husi atúal Primeiru Ministru Mari Bin Amude Alkateri, Ministru Defeza no Siguransa, Agustinho Sequeira Somotxo, membru governu sira inklui familia graduadu sira.