Dili-SMI, Desizaun finál Prezidente Repúblika Francisco Guterres Lú Olo kona-ba Eleisaun Antisipada halo partidu polítika sira hahu buka estratéjia hodi kompete iha eleisaun foun ne’e.
Partidu Libertasaun Popular – PLP, liu husi Prezidente Bankada Fidelis Mangalhaes esplika katak prontu ona tuir kampaña iha báze no fiar metin povu sei hili PLP iha eleisaun antisipada.
”Ami prevista tiha ona, katak desizaun sai hanesan ne’e, ita hotu lori fali ba povu i prepara án diak liu tan ba kampaña ba koalia fali ba povu i depois povu hare’e no povu maka sei fo konfiansa. Maibé ami fiar katak povu sei fo fiar ba ami”, Dehan Fidelis iha Palasiu Prezidente Nicolau Lobato, Aitarak Laran, Sexta, (26/01).
Parte CNRT rasik deklara ona preparadu hodi kontinua la’o ba báze kampaña hodi partispa iha eleisaun tuir mai.
"Pozisaun CNRT nian ne’e klaru no prontu hanesan partidu la’o nafatin i reorganiza para atu bele partisipa ho diak iha eleisaun”, katak Deputadu CNRT, Aderito Hugo,
Iha parte seluk, Prezidente Partidu Demokráta - PD) Mariano Assanami Sabino katak resaun ho desizaun kona-ba eleisaun antitipada, PD kontinu nakloke ba partidu partidu hothotu hodi serbisu hamutuk atu serbi povu no nasaun.
Tuir eis Ministru Agrikultor ne’e katak situasaun polítika dadaun ne’e ne’ebé koko Timor-Leste nia demokrasia, no atu hametin demokrasia ida ne’e povu maka tenki deside liu husi votasaun iha eleisaun tuir mai.