Dili-SMI, Estratéjia polítika Bloku Aliansa Maioria Parlamentu – AMP ne’ebé kompostu husi CNRT, PLP ho KHUNTO kontinua mantein ho juramentu koligasaun hodi hakat ba Eleisaun Antisipada - EA, iha ne’ebé orariu kampaña sei dekreta husi Prezidente Repúblika iha tempu badak nia laran.
“Sei mantein halo koligasaun ho Partido rua mak Partido Libertasaun Popular (PLP) no Kmanek Haburas Nacional Timor Oan (KHUNTO) ba hasoru Eleisaun Antisipada”, Dehan Prezidente Konsellu Dirativa Nasionál – KDN Partidu CNRT, Dionisio Babo ba SMI iha Uma Fukun Parlamentu Nasionál, Tersa, 30/01).
Tuir Babo katak komitmentu mantein juramentu koligasaun entre CNRT, PLP no KHUNTO ne’e sei asina plataforma koligasaun ba tinan lima oin mai antes hakat ba eleisaun antisipada. No,iha tempu badak sei realiza reuniaun alargada entre partidu koligasaun hodi hametin koligasaun nian.
“Reuniaun Hamutuk ho partidu PLP no KHUNTO sei deside hodi hasoru eleisaun antisipada no sei asina plataforma koligasaun ba tinan lima mai. Tuir planu sei realiza reuniaun alargada ho partidu PLP no KHUNTO iha semana ida ne’e nia laran”, esplika eis Ministru Estatal ne’e.
Eis Ministru Justisa iha Governasaun AMP anterior ne’e mós esplika katak iha tempu badak koligasaun sei prepara lista kandidatura hodi halo rejistu formal iha Tribunal Rekursu, hodi hein orariu kampaña ne’ebé Presidente Repúblika maka sei dekreta.
“Ami sei prepara lista koligasaun nian no bele halo aktu ida rejistu iha Tribunal Rekursu no hein hela prezidente seidauk dekreta loron eleisaun antisipada,” dehan nia. (Editór, Mateus Barros)