Dili-SMI, Konsellu Dirativa Nasionál partidu Konsellu Nasionál Rekonstrusaun Timor-Leste – CNRT (sigla portuges), Dionisio Babo Soares informa karak iha tempu badak nia laran Kay Rala Xanana Gusmão sei fila mai timor hodi partisipa kampaña polítika iha eleisaun antisipada nian.
“Iha tempu badak nia laran lider masimu CNRT Kay Rala Xanana Gusmao sei mai partisipa iha kampana politika iha eleisaun antisipada”, dehan Babo ba SMI iha Parlamentu Nasionál, Tersa, (30/01).
Deputadu husi Bankada CNRT ne’e mós esplika katak maske durante ne’e lider partidu CNRT ne’e iha rai-liu maibe sempre fo ninia instrusaun ba Bloku AMP hodi hasoru situasaun polítika iha rai-laran durante ne’e.
“Maske prezidente partidu CNRT laiha fatin, hodi hala’o servisu tamba asuntu importante kona-ba delimitasaun fronteira maritima nia iha Australia, maibé sempre rona instrusaun husi lider partidu hodi la’o tuir”, Babo konfensa.
Eis Ministru Justisa ne’e aumenta katak Xanana Gusmão nu’udar lider orijin no importante ba partidu CNRT, ho nune’e ninia prezensa iha kampaña polítika ba eleisaun antisipada importante tebes.
Nia mos klarifika katak CNRT sei mantein juramentu koligasaun ho Partidu Libertasaun Popular – PLP no KHUNTO hodi hasoru eleisaun antisipada. (Editor, Mateus Barros).