Dili-SMI, Komandante Jerál FALINTIL-Forsa Defeza Timor Leste – F-FDTL, Maijor Jenerál Lere Anan Timur agradese no apresia ba ekipaCentro Nacionál Chega – CNC ne’ebé halo ona esforsu maka’as hodi prezerva istoria Timor-Leste nian.
Lia hirak ne’e hato’o husi Lere Anan Timur iha Kuartel Jerál F-FDTL, Kinta, (13/04) durante sorumutu ho ekipa CNC lidera husi Diretúr Ezekutivu Hugo Fernandes.
Durante sorumutu ne’e, Lere afirma katak violénsia diretús umanu iha pasadu labele akontese tanba iha tempu agora no futuru oin mai.
“To’o ona ho violensia sira ne’ebé akontese iha pasadu no ba futuru labele akontese tan. Violasaun direitus umanus tenke to’o de’it iha tinan 1999 no ba oin labele akontese tan”, dehan Lere.
Lere Anan hatutan katak Timor-Leste presiza hahu hakerek ona ninia istoria hodi nune’e bele rai hela ba jerasaun foun atu bele hatene. Liu-liu istoria kona-ba prosesu luta ba ukun-rasik an.
Iha fatin hanesan, Diretúr Ezekutivu CNC Hugo Fernandes esplika katak objetivu husi sorumutu ekipa CNC ho Maijor Lere Anan Timur hodi fahe informasaun kona-ba papél CNC nian ne’ebé sei ezekuta husi Unidade Programatiku sira hanesan Unidade Memorializasaun, Unidade Edukasaun, Unidade Solidariedade no mós Unidade Relasaun Esterna.
Hugo hatutan CNC halo ona serbisu balun hodi identifika sitiu istóriku sira iha Dili laran no mós Illa Ataúro, halo lasanmentu ba Memorial no Praça Proklamasaun Independensia 28 Novembru iha Palasiu Governu nia oin no sei kontinua identifika fatin istóriku sira seluk iha teritoriu Timor-Leste.
Nia mós esplika durante ne’e halo serbisu iha área Edukasaun nian, hodi kontinua habelar istória pasadu ba estudante sira liu husi estabelese Centro Bibleoteka Chega, iha eskola sira hodi enkoraja estudante no joven sira atu hakerek istoria husi sira nia inan-aman no familia sira ne’ebé envolve mós iha funu ba libertasaun.
Enkuantu iha área solidariedade, Diretór Ezekutivu mós informa katak CNC halo ona kooperasaun ho Ministériu Solidariedade Sosial – MSS, liu-liu atu apoiu vitima no sobrevivente sira no seluk tan. (Editor, Mateus Barros).