Dili-SMI, Prezidente Komisaun Nasionál Eleisaun (ho sigla Portugues CNE) Alcino Barris sente preokupa ho lider Partidu Polítiku – ParPol sira ne’ebé durante semana ida ona halo kampaña eleitorál maibe koalia hatun malu deit no la hato’o programa partidu ba povu.
Prezidente CNE ne’e husu ba lider ParPol sira ne’ebé halo kampaña atu hato’o programa partidu nian ba povu nia moris diak la’os atu hatun-malu iha militante no simpatizante nia oin.
“CNE rekomenda nafatin ba lider partidus sira ne’ebé hetan oportunidade diak uza kampaña fahe programa sira ne’ebé sira hato’o ba militantes ho apoiantes sira, maibé oportunidade ne’e sira uza lori hatun malu”, dehan Alcino Barris liu husi Konfrensia Imprensa iha Salaun CNE, Kaikoli, Segunda, (16/04).
Nia hatutan rezultadu husi CNE ninia supervisaun durante kampaña semana ida ne’e repara katak lider ParPol ne’ebé mai husi jerasaun 1975 la hato’o programa iha kampaña maibe ataka malu no hatun malu hodi loke sira nia frakeza segredu ba públiku.
“Lideres ParPol sira liu-liu sira ne’ebe mai kedas jerasaun tinan 1975 sira ataka malu, sira hatun malu, loke sira hotu-hotu ninia frakeza segredu tomak ba iha povu, CNE senti triste tamba sira bainhira konsentra deit atu hetan votus sira la sukat, sira ho sira mak fase malu, sira ho sira mak hasai sira nia frakeza sira ne’e ba deit eleitores sira”, dehan Prezidente CNE.
Ho nune’e, eis Ministra Interior ne’e apela ba lider ParPol sira atu kuidadu ho linguazen ne’ebé informativu no edukativu hodi nune’e labele fó biban ba militante no simpatizante vota tanba odiu.
“ParPol sira kuidadu ba linguazen sira ne’ebé hato’o iha kampaña ne’e informativa ho edukativu, labele halo fali militantes simpatizantes sira ba vota ho odiu”, dehan Barris. (Editor, Mateus Barros)