Dili-SMI, Atu prezerva istoria Timor-Leste nian, ekipa Centro Nacional Chega – CNC hodi hala’o vizita ba Centro Audio Visual Max Stahl- CAMSTL hodi haree oinsa prosesu arkivu istória pasadu Timor-Leste nian iha sentru refere.
Durante vizita ne’e, ekipa CNC hetan esplikasaun husi ekipa CAMSTL kona-ba prosesu arkivamentu lor-loron, maneza arkiva no oinsa halo transkripsaun dokumentu sira, halo dizitalizasaun hodi nune’e bele asegura dokumentu ba tempu naruk nian.
“Iha vizita ne’e ekipa CNC rona esplikasaun hosi EKIPA CAMST kona-ba oinsa sira nia serbisu lorong-lorong maneza arkivu hanesan halo transkripsaun ba dokumentu sira, halo dizitalizasaun no ikus liu oinsa mak asegura katak dokumentu sira ne’e kontinua seguru ba tempu naruk”, Hakerek iha komunikadu imprensa ne’ebé públika iha pajina ofisiál CNC, Tersa, (18/04).
Iha pajina ofisiál CNC ne’e hakerek katak durante vizita ne’e diskute sobre futuru koperasaun entre CNC ho CAMSTL kona-ba asuntu kapasitasaun, maneza no prezerva arkivu.
“Iha vizita ne’e mos parte rua hahu koalia kona ba oinsa instituisaun rua ne’e bele servisu hamutuk iha asuntu prezerva arkivu liu husi nota intendementu ida ne’ebé sei foka liu ba kapasitasaun, maneza no prezerva arkivu”, hakerek iha pajina CNC. (Editor, Mateus Barros).
