Dili-SMI, Prezidente Aliansa Maioria ba Progresu – AMP, Kay Rala Xanana Gusmão hateten formasaun VIII Governu konstitusionál ne’e kompeténsia husi Prezidente Repúblika tanba prezidente mak sei nomea Primeiru Ministru ba Governu foun ne’e.
“Ohin ami mai dehan deit katak enkontru rapida kuandu dehan rapidu signifika katak iha mós hanoin hanesan, hakarak hanesan, ne’e mak dehan lalais, lae ita diskute kleur, mais buat sira ne’e hotu prezidente mak sei fó sai, prezidente mak sei nomea Primeiru Ministru”, dehan Prezidente AMP, Xanana Gusmão, iha Palasiu Prezidensiál Aitarak-Laran, Tersa (19/06).
Prezidente AMP Xanana Gusmão fó agradese ba PR ne’ebé preokupa ho situasaun polítika iha rai-laran hodi aslera lalais formasaun VIII Governu konstitusionál
Xanana hatutan katak koligasaun AMP hein deit rezultadu husi Prezidenti Repúblika hodi halo nomeasaun PM ba VIII Governu nian.
“Ami mai deit atu dehan katak enkontru rapida ne’e dehan katak ambiente politika ne’ebé ita fó hanoin ba malu ne’e diak, ami agradese tebes ba prezidente nia preokupasaun ba situasaun polítika ne’ebé mak agora ne’e la’o hela iha ita nia rai. Hanesan koligasaun, buat hotu ne’e ita sei hein ba prezidente mak sei fó sai rezultadu”, dehan Xanana.
Eis PM IV Governu ne’e esplika tann katak PR bolu AMP hodi konsulta kona-ba prosesu formasaun Governu, tanba PN nasionál toma pose ona. (Editor, Mateus Barros).
