Dili-SMI, Komandante Polisia Nasional Timor Leste - PNTL Munisipiu Dili, Superintendente Xefe, Pedro Belo apela ba membru instituisaun polísia labele konsidera jornalista ka mídia nu’udar inimigu maibe konsidera hanesan parseiru serbisu hodi serbi povu no nasaun.
“Hau sempre fo hatene ba segundu komandante katak bainhira kuandu media sira hakarak buka informasaun iha ita nia fatin, ita fó fatin ba sira para pasa informasaun ba sira, labele hanoin katak mídia hanesan inimigu ba ita ne’e laloos, sira ita nia parseriu serbisu”, dehan Superintendente Xefe, Pedro Belo, iha Salaun Beach Garden Hotel, Pantai Kelapa, Kuarta (20/06).
Pedro Belo rekuiñese katak apresiasaun pozitivu ne’ebé instituisaun PNTL hetan husi públiku durante ne’e tanba kontribuisaun mídia ne’ebé sempre públika atividade polísiál nian.
Tanba ne’e, Belo husu ba mídia atu kontinua serbisu hamutuk ho instituisaun seguransa ninia serbisu liu-liu serbisu unidade polisia sira atu nune’e públiku bele tuir no kompriende.
Maske nune’e, Belo husu ba jornalista sira atu kumpri regra jornalista nian hodi tau atributu kartaun wainhira atu halo kobertura ba atividade polisia nian, labele subar kartaun ka subar hodi hasai fotográfia no halo filmajen.
“Husu ba jornalista sira bainhira hakarak atu hasai foto tenke tara kartaun, subar husi kotuk-kotuk hasai foto dala ruma polisia deskonfia koalia dehan jornalista, presiza atu hetan informasaun ida ne’e, ne’e laiha problema dala ruma subar-subar ne’e mak orsida deskonfia malu”, Belo fó hanoin ba jornalista sira.
Nia mós rekomenda ba Conselho Imprensa atu tau atensaun ba informasaun ne’ebé mídia públika tanba informasaun balun ne’ebé mídia públika ladun iha balasu.
Tanba tuir nia esperensia katak publikasaun notisia iha mídia balun la ho fontes ne’ebé klaru. (Editor, Mateus Barros).
