Dili-SMI, Polítika sosa kareta prado foun ba kada tinan lima ba membru Parlamentu Nasionál – PN sai ona nu’udar kultura iha Timor-Leste ne’ebé sempre hamosu pro-kontra entre sosiadade sivil no lejizlador sira.
Vise I Prezidente PN, Maria Angela Sarmento, defende sosa prado foun ba deputadu no deputada V lejizlatura ho razaun atu fasilita serbisu lejizlador sira iha uma fukun PN.
“Deputadus sira ne’ebé mak mai serbisu iha parlamentu sira presiza fasilidade atu bele fasilita sira nia serbisu, bain-bain ita nia sosiadade sira haree deputadus mai ho kareta marka Prado, maibé ba deputadu sira la’os marka mak importante”, dehan Angela Sarmento, iha PN, Segunda, (25/06).
Ho razaun prioridade no importante, Angela Sarmento afirma, PN tau nu'udar sai ajenda prinsipál hodi diskute kona-ba sosa kareta prado refere. Maibe, nia esplika, kestaun sosa kareta prado hirak ne’e kompeténsia Konsellu Administrasaun PN nian.
“Ami haree katak preoridade tebes tau ajenda hodi debate iha tempu badak, iha kareta foun ka halo kontratu oinsa mak atu rezolve kestaun viaturas ba deputadu sira ne’e kabe ba kompetensia konselho administrasaun”, dehan nia.
Tuir Angela, fasilidade hanesan kareta prado atu bele ajuda deputadu sira nia serbisu hod masimu nu’udar reprezentante povu iha uma fukun PN nian.
iha parte seluk, tuir Movimentu Universitariu Timor-Leste – MUTL , razaun sosa kareta prado foun ba V lejizlatura la’os defende interese povu no nasaun maibe defende interese kanten nian.
Liu husi Konfrensia Imprensa iha loron 21 foin lalais ne’e, MUTL ba mídia nasional www.tafara.tl deklara la konkorda sosa kareta prado foun ba membru PN VIII lejizlatura, no bele uza kareta prado tempu III lejizlatura hodi halo serbisu tanba kareta hirak ne’e sei iha kondisaun diak.
“Laiha dalan ba parlamentu nasionál V lejizlatura atu hola kareta prado foun, ne’e deskorda 100% husi MUTL. Tanba kareta prado 65 ne’ebé eis membru parlamentu nasional III lejizlatura uza sei (iha) kondisaun diak’, dehan porta-voz MUTL, Paijiu Santos.
Afirma porta voz MUTL, iha tempu badak ekipa MUTL sei halo audensia ho Prezidente Parlamentu Nasionál – PPN, Arão Noe, no Konsellu Administrasaun PN nian hodi hapara polítika sosa kareta prado ne’e.
Maibe, karik laiha resposta emidiata ne’ebé pozitivu husi PPN maka MUTL sei organiza estudante no movimentu universitariu sira inklui sosiadade sivil hodi halo manifestasaun hasoru PPN ho membru V lejizlatura tomak.
PPN, Arão Noe Amaral, antes ne’e deklara mós iha mídia nasionál sira konkorda atu sosa kareta prado foun ba membru V lejizlatura. (Editor, Lariwa).
