Jakarta-SMI, Prezidente Parlamentu Indonézia - PPI, Bambang Soesatyo, afirma, Governu no Estadu Indonézia iha komitmentu hodi kontinua apoiu Timor-Leste ba adezaun ASEAN ne’ebé to’o ohin loron sei iha prosesu laran.
“Ami reafirma nafatin apoiu totál adezaun Timor Leste nian ba ASEAN”, dehan Prezidente Parlamentu Indonézia, Bambang, durante enkontru ho Prezidente Repúblika Timor-Leste, Francisco Guterres “Lú Olo”, Sesta, (29/06), orseik ne’ebé públika iha pajína ofisiál mídia PR nian.
Prezidente Parlamentu Bambang, liu husi Prezidente Repúblika fó ninia apresiasaun ba Estadu no povu Timor-Leste ne’ebé susesu iha prosesu realizasaun Eleisaun Antesipada iha fulan-Maiu 2018, fulan hirak liu ba.
Liu husi oportunidade enkontru ne’e, lider parlamentu Indonézia ne’e hakarak konvida deputadu Parlamentu Timor-Leste nian, hodi partisipa iha Forum Parlamentu Mundiál ne’ebé mak sei realiza iha Bali, fulan-Setembru tinan-2018.
Durante enkontru, Lú Olo ho Bambang koalia mós asuntu importante seluk hanesan fronteira maritima no terrestre ne’ebé to’o ohin loron seidauk rezolve.
“Amimós ko’alia asuntu importante hanesan fronteira terrestre ne’ebé sei termina no fronteira tasi,” Prezidente Parlamentu Indonézia afirma.
Iha parte seluk, Xefe-de-Estadu, Lú Olo, agradese ba Indonézia nia konsisténsia polítika hodi apoiu Timor-Leste ba adezaun ASEAN nian.
Nune’e mós apresia ba hanoin pozitivu sira husi parte Indonézia ne’ebé hakarak atu rezolve problema fronteira maritima no terestre entre rai-rua nian.
“Ha’u deklara katak hanesan nasaun viziñu, ita hatene oinsá atu rezolve problema fronteira maritíma ho terrestres. Ha’u fiar katak nasaun rua sei hetan solusaun,” dehan Lú Olo.
Prezidente Lú Olo, sente kontente hasoru malu ho Prezidente Parlamentu Indonézia tanba bele kontinua hametin relasaun ne’ebé diak ba nasaun rua.
Ha’u kontente vizita estadu dahuluk mai Indonézia, ha’u nia satisfasaun mai hasoru Prezidente Parlamentu Indonézia, tanba relasaun amizade nasaun rua la’o di’ak tebes”, tenik nia.
Vizita estadu Prezidente-da-Repúblika Lú Olo Parlamentu Indonézia ne’e simu diretamente husi Prezidente Parlamentu Indonézia, Bambang Soesatyo ho lider no responsavél komisaun sira. (Editor, Lariwa).