Dili-SMI, Primeiru Ministru VIII Governu konstitusionál, Taur Matan Ruak – TMR kontinua diskute ho Prezidente Repúblika, Francisco Guterres “Lú Olo” kona-ba lista membru Governu ne’ebé seidauk hetan toma pose hodi kompleta estrutura VIII Governu nian.
Hafoin hasoru malu ho Xefe-de Estadu, Taur Matan Ruak esplika katak nia parte sei kontinua esforsu hodi diskute kona-ba lista membru Governu ne’ebé seidauk hetan toma pose to’o ohin loron.
“Ba lista membru Governu ne’ebé seidauk simu tomada-de-posse, sei kontinua halo diskusaun ho Sr. Prezidente para hetan solusaun ida, pur-enkuantu seidauk hetan solusaun”, dehan TMR hafoin remata enkontru ho PR, iha Palasiu Prezidensiál Aitarak-Laran, Tersa, (10/07).
Durante enkontru, TMR no Lú Olo mós koalia kona-ba utilizasaun orsamentu duodésimu ba VIII Governu nian.
Ba jornalista sira, TMR esplika katak dezafiu ne’ebé dadaun ne’e VIII Governu infrenta mak serbisu ho orsamentu duodésimu hodi funsiona makina estadu, maibe presiza selu saláriu no vensimentu inklui dívidas balun ne’ebé presiza Governu selu.
“Governu serbisu ho duodésimu de’it, no preokupa saláriu no vensimentu no dívidas balun ne’ebé tenke selu”, dehan Taur
Maske nune’e, TMR garante ba Xefe-de-Estadu katak, aban, (11/07) Konsellu Ministru sei diskute orsamentu hodi lori ba Parlamentu Nasionál iha tempu badak atu nune’e bele fasilita makina Estadu ba fulan Jullu no Agostu nian.
“Aban, loron-11 fulan-Jullu Konsellu Ministru sei diskuti orsamentu ida, sei lori ba Parlamentu Nasionál iha tempu besik nia laran, hodi bele sustenta mákina Estadu iha fulan Jullu no Agostu”, tenik eisa Prezidente Repúblika ne’e.
Hatan ba situasaun polítika atúal iha rai-laran, TMR afirma, sei hamutuk ho PR Lú Olo nomós povu tomak hodi garante paz no estabilidade iha ra-laran. (Editor, Lariwa).