Tibar-SMI, Relasiona ho preokupasaun públiku kona-ba lixu iha Tibar ne’ebé fó impaktu ba komunidade nia saude no ambiente, Sekretáriu Estadu Meiu Ambiente – SEMA, Deometrio de Amaral Carvalho fó kulpa ba MIniteriu Administrasaun no Estatal – MAE tanba laiha kontrolosaun hodi fó livre komunidade hela iha area refere.
“Lixu Tibar nakonu tanba falta kontrolu husi entidades hotu, hanesan Ministériu Administrasaun Estatal, hodi fó livre ba komunidade Tibar hela besik iha fatin lixo refere”, dehan SEMA, Deometrio de Amaral Carvalho, iha nia serbisu fatin, Fomentu-Dili, Kinta, (27/06).
Tuir Deometrio, estadu iha responsabilidade atu fó kondisau ne’ebé dignu ba komunidade iha area lixo TIbar liu husi realokasaun ba fatin seluk hodi nune’e labele hetan impaktu husi lixu refere.
“Tenke fó informasaun lolos ba populasaun sira katak, fatin lixu ne’e fatin perigu ba ita nia moris, Ita tenke haree kondisaun ida dignu hodi halo realokasaun atu bele minimiza ema sira ne’ebé hela iha ne’eba ne’e, tanba simu risku sira husi Lixu refere”, dehan Deometrio.
Governante husi Partidu Libertasaun Popuar – PLP ne’e esplika, sei halo edukasaun sivika ba públiku ba kada uma-kain kona-ba ambiente ne’ebé moos hodi nune’e bele konsensializa komunidade soe foer iha fatin ne’ebé loloos.
Iha parte seluk, autoridade lokál Tibar, Bento Correia hateten, desizaun estadu no Governu ne’ebé soe foer iha ninia area suku Tibar fó impaktu boot tebes ba komunidade nia saude inklui ambiente iha area refere.
“Lixu sira ne’e programa estadu nian, lixu fatin ida ne’e dezde tempu Indonézia nian, ho lixu sira ne’e fó impaktu ba komunidade Tibar, hanesan moras oioin, ,mear, joven hili tua hemu no balun mate”, dehan Xefe Suku Tibar
Lider komunidade ne’e sujere, Governu presiza kria kondisaun ne’ebé seguru ba komunidade husi lixu hanesan halo moru halaeu fatin lixu atu nune’e komunidade labele tama arbiru.
“Governu katak tenki tau fatin ne’ebé seguru, hanesan moru laran para komunidade labele tama arbiru, sekarik governu la tau matan ba fatin lixu ida ne’e mak sei fó impaktu ba komunidade sira hetan moras bei-beik”,dehan Bento Correia.
Nia esplika, durante ne’e nia ho membru Suku fó ona atensaun bebeik ba komuniade labele halo atividade iha fatin lixu, maibe komunidade kontinua tanba maioria moris ho lixu.
To’o notisia ne’e públika SMI seidauk halo konfirmasaun ho parte autoridade Ministériu Administrasaun Estatal nian. (Ricardo de Araújo/Mateus Lopes ) (Editor, Lariwa)
