Dili-SMI, Konsellu Ministru –KM, Kuarta ohin, (11/07) deside ona hodi kontinua estende mandatu Komisáriu Komisaun Anti Korupsaun – KAK, Duarte Tilman ne’ebé ninia mandatu etapa segundu sei termina iha loron 15 fulan Jullu tinan ida ne’e.
Razaun Konsellu Ministru hodi kontinua estende ba mandatu Komisáriu KAK, Aderito Tilman, tanba to’o ohin loron seidauk iha kandidatu foun ne’ebé aprezenta hodi troka Komisáriu KAK atúal.
“Konsellu Ministrus aprova proposta Primeiru-Ministru nian atu halo estensaun ba mandatu Komisáriu Komissaun Anti Korrupsaun- CAC. Estensaun ba Komisáriu CAC atuál, Aderito Tilman, tanba la iha kandidatu foun ne’ebé aprezenta”, dehan Komunikadu Imprensa husi Gabinete Primeiru Ministru ne’ebé SMI asesu, Kuarta, (11/07).
Tuir planu, naran Komisáriu KAK atúal Governu sei lori ba Parlamentu Nasionál iha tempu badak nia-laran hodi hetan aprovasaun.
Reuniaun Konsellu Ministru ne’e prezide husi Primeiru Ministru VIII Governu Konstitusionál, Taur Matan Ruak.
Komisáriu KAK, Aderito Tilman, iha loron 4 fulan Jullu deklara ba mídia nasionál katak ninia mandatu sei remata iha loron 15 fulan Jullu hafoin aprezenta relatóriu serbisu KAK tinan 2017 ba Parlamentu Nasionál. (Editor, Lariwa).