Dili-SMI, Xefe-de-Estadu, Francisco Guterres “Lú Olo” sente preokupa ho publikasaun informasaun lia bosok no insulta malu ne’ebé dadaun buras tebes iha rede mídia sosiál hanesan Facebook tanba bele fó impaktu negativu ba unidade nasionál, paz no estabilidade iha rai-laran.
Preokupasaun Xefe-de-Estadu ne’e hato’o husi Xefe Casa Sivil Presidensia da Repúblika, Francisco Vasconselhos, wainhira lee mensajen Prezidente Repúblika hodi taka Konfrénsia Internasionál loron rua kona-ba Hametin Mekanizmu Auto-Regulasaun Mídia iha Súdeste Aziátiku no Pasífiku ne’ebé organiza husi Conselho de Imprensa de Timor-Leste, Sexta, (20/07).
Tuir Prezidente Lú Olo, Timor-Leste nu’udar nasaun foun maibe ema barak tebes mak dadaun ne’e uza rede mídia sosiál hodi insulta no públika imajen at sira ho naran falsu.
“Hau hakarak aproveita oportunidade ida ne’e atu bolu atensaun hothotu nian ba mídia sosiál ne’ebé ema barak tebes uza. Meiu ida ne’e efetivu duni atu hato’o lalais notísia no opiniaun. Maibe, ikus mai mosu imajen no liafuan kroat no aat tebes, iha rede sosiál, husi ema balun ne’ebé subar-an ho naran falsu”, Mensajen PR liu husi ninia mensajen.
Komadante Supremu Forsa Defeza ne’e mós esplika, uza mídia sosiál facebook ne’ebé la ho responsabilidade no étika sei estraga relasaun amizade, unidade nasionál no hamate kultura debate no fahe matenek ho kualidade nu’udar povu iha nasaun ida ne’e.
Kathryn Roja G. Raymundo, Oficer Alerst SEAPA, wainhira hala’o ninia aprezentasaun ba partisipante jornalizmu kompriensivu durante loron rua (14-15/07) iha Dili, esplika, tuir relatóriu organizasaun Hootsuite ne’ebé fó sai iha fulan Janeiru 2018, Timor-Leste tama katégoria nasaun ne’ebé ninia populasaun maioria uza internete, liu-liu rede mídia sosiál hanesan facebook.
Nia esplika, husi totál populasaun Timor-Leste hamutuk 1.31 milloens maizumenus ema na’in millaun atus hat sanolu (410 mill) mak uza rede mídia hanesan facebook ne’ebé ho 90% asesu liu husi telefone. Komparasaun asesu rede facebook, feto 40% no mane 60%. (Editor, Lariwa).
