Dili-SMI, Membru Parlamentu Nasionál – PN husi bankada FRETILIN, Antonino Bianco, hatete, deputadu Partidu Libertasaun Popular – PLP sira labele gava-an tanba laiha kapasidade hodi defende programa Governu liu husi debate ne’ebé ho kualidade.
Tuir membru PN husi bankada FRETILIN ne’e, ukun ne’ebé kualidade la’os mai husi votasaun a favor iha PN maibe oinsa hatudu kapasidade no kualidade iha debate ba programa Governu nian.
“Ita ukun ne’e kualidade la’os husi votasaun maibé kualidade husi debate. Deputadu PLP labele gava-an ho kadeira ualu (8) atu garante programa Governu nian, tanba uluk iha primeiru Governu FRETILIN ho kadeira lima nolu resin lima (55) deit mós la garante”, dehan Bianco, iha PN, Tersa, (31/07).
Bianco mós kestiona fila fali asuntu fronteira marítima iha inserteja nia laran tanba liña fronteira tasi define ona maibe Timor-Leste hetan deit pursentu hitu nolu (70%) kompara ho antes define liña fronteira hetan pursentu sia nolu (90%).
“Ami hatene, fronteira marítima ne’e dehan serteja ne’e husi ne’ebé, inserteja tamba sa mak pursentu hitu nulu (70%) ba ita no pursentu tolu nulu (30%) ba Australia, fronteira maritima definidu tiha ona. Sé uluk seidauk iha fronteira marítima ita hetan pursentu sia nolu (90%) sira hetan pursentu sanulu (10%)”, dehan nia.
Responde ba liafuan diskredita husi deputadu FRETILIN, membru deputadu bankada Partidu PLP, Francisco de Vasconselhos, hateten, maske ho kadeira ualu (8) maibe hatene koalia polítika no halo estratéjia polítika hodi garante Governasaun AMP.
Deputadu PLP ne’e duvida ho polítika partidu FRETILIN ba dezenvolvimentu povu no nasaun nia vida. Deputadu husi Aliansa Maioria Parlamentar – AMP ne’e konsidera deputadu FRETILIN mak laiha kapasidade no debate la kualidade tanba laiha estratéjia polítika ne’ebé klaru hodi kontribui ba nasaun.
“Hau dehan FRETILIN lahatene atu ba ne’ebé, lalika dehan kadeira ualu (8) oan deit, ualu ne’e hatene polítika, la’os hatene deit politika, hatene estratejia politika. Dala barak maluk sira dehan ka’an poder, poder la’os mai husi partidu, poder mai husi povu, no povu fó fiar mak ita forma governu”, tenik nia. (Editor, Mateus Barros).
.