Dili-SMI, VIII Governu Timor-Leste liu husi reuniaun Konsellu Ministru – KM deside ona atu fó apoiu fundu umanitáriu hamutuk $. 650 ba povu Indonezia ne’ebé hetan dezatre naturál (rai-nakodoko) iha loron 29 iha Lombok, Sumbawa no Bali ne’ebé konsege estraga infra-estrutura báziku iha nasaun refere. Inklui ajuda umanitária ba asidente barajen nakfera iha nasaun Birmania foin lalais ne’e.
“Konsellu Ministru deside halo aprovasaun ba Rezolusaun Governu nian atu fó donativu umanitária ba asidente rai-nakdoko iha Lombok-Indonézia no barrajen nakfera iha Laos ho montante hamutuk $650 mil ba nasaun rua ne'e, nu’udar devér internasionál Timor-Leste nian hanesan Estadu membru ONU”, Haktuir Komunikadu Imprensa husi Gabinete Primeiru Ministru ne’ebé SMI asesu, Kuarta, (01/08).
Razaun reuniaun KM deside hodi aprova Rezolusaun Governu nian atu fó donativu umanitária ba asidente rai-nakdoko iha Lombok-Indonézia no barrajen nakfera iha Laos ne’e nu’udar devér internasionál Timor-Leste nian hanesan membru Organizasaun Nasoens Unidas nian.
Ajenda prinsipál tolu ne’ebé diskute durante reuniaun KM mak kona-ba Programa Treinamentu Pilotu Militár" entre F-FDTL ho Forsa Armada Filipina, fó doasaun ba vítima rai nakdoko iha Lombok-Indonesia, nomós doasaun ba asidente barajen nakfera iha nasaun Laos-Birmania.
Iha parte seluk, tuir rezultadu monitorizasaun Badan Meteorologi, Klimatologi no Geofisika – BMKG katak iha loron duminggu (29/07) akontese rai nakdoko dala tolu nolu resin ida (31) ho ninia forsa 6,4 skala richter iha area Lombok, Bali no Sumbawa.
Xefe Sentru Rai Nakdoko no Tsuname BMKG, Rahmat Triyono ne’ebé fó sai ninia deklarasaun liu husi eskrita ba mídia nasionál iha Indonézia, hatete, rai-nakdoko ne’ebé akontese iha area trestre maizumenus kilometru 47 husi parte leste sidade Mataram, Nusa Tenggara Barat–NTB, Indonézia. Rai nakdoko ho ninia forsa maizumenus 24 kilometru ba rai-okos. (Editor, Mateus Barros)
