Dili-SMI, Instituisaun Polísia Nasionál Timor-Leste – PNTL liu husi Servisu Migrasaun dadaun ne’e infrenta dezáfiu hodi kontrola migrante ilegál iha area fronteira trestre tanba falta internete hodi apoiu servisu migrasaun ho postu fronteira inklui embasada estranjeiru sira iha rai-laran.
Diretór Jerál Servisu Migrasaun, Superintendente Asistente Polisia, Boavida Ribeiro, hatete, dadaun ne’e monta ona ekipamentu no sistema hodi kontrola diak liu tan migrante ilegál iha area fronteira maibe infrenta problema tekniku, laiha koneksaun internete hodi kontrola ho efisensia.
“Ba dadaun ne’e, equipamentu ba sistema kontrola fronteira nian, iha ona no halo tiha ona konfigurasaun téknika, maibe difikuldade ida ami parte tekniku sira enfrenta maka, koneksaun internet. Minimu ami persiza 8 megabytes hodi halo ligasaun Internet entre Sede Servisu Migrasaun ho Postu Fronteira sira nomós ho Embaixada sira”, dehan Boavida, liu husi komunikadu imprensa, Segunda, (06/07).
Ribeiro hatutan, Servisu Migrasaun presiza liña internete ne’ebé boot hodi bele halo koneksaun ba ekipamentu foun ne’ebé dadaun iha ona hodi nune’e bele ajuda serbisu migrasaun iha area fronteira.
“Sistema Jestaun Kontrolu Fronteira ida ne’e, importante tebes ba ita hodi kombate diak liutan migrasaun ilegal. Problema maka falta liña intenet no orsamentu. Ami persija koneksaun ida ne’ebe bot hodi bele monta ekipamentu foun ne’ebe iha ona. Ita persija moderniza ita nia sistema, ho razaun ida katak, lakleurtan ita tama ona ba Azean”, dehan nia.
Parte seluk, Ministru Interior interinu, Filomeno Paixão, husu atu Diresaun Jerál Servisu Migrasaun prepara dadus konkreta hodi Ministru bele halo diskusaun diak liutan iha Konsellu Ministru nomos relata semanál ba Prezidente Repúblika.
Sosiadade Sivil hanesan Fundasaun Mahein – FM ne’ebé públika ninia relatóriu iha loron 30 fulan Jullu foin lalais ne’e, relata katak desde Timor-Leste hetan ninia independensia hetan dezáfiu boot hodi kontrola migrante ilegál ne’ebé tama mai iha rai-laran.
Relatóriu ne’e esplika, falta rekursu umanu no fasilidade sai kestaun ne’ebé prejudika servisu migrasaun hodi halo monitoriza area fronteira treste ne’ebé luan tebes. Ho nune’e, Fundasaun Mahein atu haree didiak asuntu migrante ilegál tanba bele fó impaktu ba siguransa iha rai-laran. (Editor, Lariwa).