Dili-SMI, Bázea ba grupu partidu CNRT ne’ebé fó ultimatum ba Prezidente-da-Repúblika, Francisco Guterres “Lú Olo” sobre kandidatu membru Governu ne’ebé seidauk toma pose, Maijór-Jenerál Lere Anan Timur, apela ba públiku atu labele halo presaun ba líder orgaun soberanu sira.
“Ha’u nu’udar elementu ba seguransa, seguransa ba órgaun soberanu haat hotu, ba nasaun tomak, órgaun hat ne’e mak reprezenta estadu, nasaun Repúblika Demokratika Timor-Leste, ha’u dehan iha Timor la iha ema ida que boot liu Prezidente-da-Repúblika. Ha’u apela ba Timor oan sira lalika presiona órgaun soberanu sira, sira iha sira nia kompetensia rasik atu uza,” dehan Maijor Jenerál, Lere Anan ba jornalista sira iha Palásiu Prezidente Nicolau Lobato, Kuarta, (08/08).
Tuir Lere Anan, Prezidente Repúblika iha kompetensia tomak hodi halo desizaun bázea ba konstituisaun Repúblika Demokrátika Timor-Leste – KDRTL. No, nia afirma katak:
“Ami nu’udar forsa Armadas ami aparellu do estadu, estadu dehan A, A dehan B, B. Ne’e mak ha’u hanoin katak ekipa ida ne’ebé halo presaun ba Prezidente, ha’u dehan sira sala, ita nunka presiona orgaun soberanu ida, tamba povu konfia nee mak tau nia iha ne’eba.
Maijór Jenerál, fó razaun katak kandidatu membru Governu ne’ebé seidauk hetan pose ne’e nu’udar sidadaun ne’ebé hetan fiar husi Primeiru Ministru atu asumi kargu ruma iha Governu, maibe Prezidente-da-Repúblika eleitu demokrátiku husi povu Timor-Leste liu husi eleisaun jerál 2017.
Tanba ne’e, lider militar ne’e la aseita ba kualker aktu husi grupu atu halo presaun ka halo asaun demonstrasaun hasoru Prezidente-da-Repúblika ne’ebé bele hamosu situasaun ladiak iha rai-laran.
“Agora o halo presaun ne’e nusa? Presaun ne’e tipu demonstrasaun ne’e, demonstrasaun, o halo demonstrasaun objetivu saida? atu halakon buat at ruma, la’ós demonstrasaun para agraba tan situasaun, ida ne’e mak ita hanoin katak labele aseita”, dehan Lere.
Iha parte seluk, loron tersa (07/08) foin lalais ne’e, Kordenador Partidu CNRT husi munisipiu 12 inklui Rejiaun Autonónumu Oe-Cusse hala’o konfrensia imprensa hodi fó ultimatum ba Prezidente-da-Repúblika atu fó lalais toma pose ba membru kandidatu Governu ne’ebé to’o ohin loron sei pendente hela.
Liu husi konfrensia imprensa, Kordenador partidu CNRT husi munisipiu sira husu atu Prezidente Lú Olo atu hala’o ninia knár tuir konstituisaun RDTL nu’udar Xefe-de-Estadu ba povu tomak, la’os prezidente partidu FRETILIN nian.
“Husu ba Señor Francisco Guterres Lú Olo atu komporta ninia desizaun sira nu’udar Prezidente-da-Repúblika, laós Prezidente Partidu FRETILIN nian”, deklara husi Kordenador Partidu CNRT husi munisipiu 13 liu husi komunikadu Imprensa ne’ebé públika iha pajina AMP nian.
Kordenador partidu CNRT husi munisipiu tomak konsidera katak formasaun VIII Governu ne’ebé to’o ohin loron paradu hela tanba aktu inresponsabilidade husi Xefe-de-Estadu nian ne’ebé viola prinsipiu separasaun poder tuir konstituisaun haruka no hakanek segredu justisa.(Editor, Lariwa).