Dili-SMI, Premíadu Nobel ba Paz, José Ramos Horta, hasoru malu ho atúal Prezidente-da-Repúblika, Francisco Guterres “Lú Olo” hodi diskute no rona Xefe-de-Estadu nia pontu-de-vista kona-ba situasaun polítika ne’ebé dadaun nasaun infrenta.
“Ha’u mai ko’alia oituan ho señor Prezidente para rona oituan señor Prezidente, Prezidente nia apresiasaun ba situasaun polítika nasionál”, dehan eis Xefe-de-Estadu, José Ramos, liu husi Komunikadu Imprensa ne’ebé SMI asesu liu husi mídia gabinete Prezidente, Kinta, (09/08).
Horta argumenta katak, situasaun polítika atúal ne’ebé akontese iha Timor-Leste halo populasaun preokupadu ho programa Governu, orsamentu inklui asuntu ekonomia ne’ebé dadaun ne’e la’o.
Eis Prezidente ne’e mós fó ninia observasaun katak diálogu polítika entre Xefe-de-Estadu no Primeiru Ministru nu’udar meus pozitivu hodi hetan solusaun ho diak ba problema ne’ebé dadaun povu no nasaun infrenta.
Horta fiar katak, Xefe-de-Estadu, Francisco Guterres “Lú Olo” laiha intensaun at atu impede formasaun VIII Governu, maibe hakarak governasaun ne’ebé diak, ne’ebé VIII Governu presiza haree didiak kandidatu membru Governu ne’ebé atu serve nasaun no povu.
“Prezidente-da-Repúblika lahanoin atu sai fali obstaklu ba formasaun Governu tamba hanesan Xefe-de-Estadu, nia hakarak governasaun tenki la’o ho di’ak tan ne’e mak nia husu ba Governu atu haree fila fali membrus ne’ebé atu serve Governu”, dehan Ramos Horta.
Relasiona ho situasaun polítika atúal iha rai-latan, eis diplomata no ativista pro independensia ne’e afirma, lakohi interven kona-ba prosesu negosiasaun no diskusaun entre Governu ho Xefe-de-Estadu, maibe fó ninia opiniaun atu bele buka solusaun ne’ebé diak ba povu no nasaun.
Maibe, nia fó argumentu katak parte rua tenke nafatin respeitu konstituisaun, Governu presiza konsidera konvikasaun prezidente nian, nomós nu’udar Prezidente presiza mós respeita no konsidera Governu nia todan hodi nune’e bele rezulta solusaun ne’ebé adekuadu.
Kabe ba ezijénsia husi kuadrus Partidu polítiku ne’ebé mak fó ultimatu ba Xefe-de-Estadu atu fó tomada-de-posse ba membru Governu pendente, Eis Prezidente-da-Repúblika, Ramos Horta husu ba militante no simpatizante husi partidu polítiku sira labele fó presaun ba malu tanba bele hamosu konflitu iha rai-laran.
“Ba kada forsa polítika, kada Instituisaun, di’ak liu lalika fó ultimatu ba malu. Dala ruma ita halo ultimatu aumenta tan konflitu. Fó ultimatu bainhira ita la iha karik kapasidade atu rezolve Nasionál no Primeiru Ministru. Diakliu lalika fó ultimatu ba malu”, dehan Horta.
Eis Prezidente-da-Repúblika ne’e fiar katak iha tempu badak nia laran situasuan polítika sei rekopera tamba iha parte seluk nia haree Primeiru Ministru mós esforsu-an loos hodi rezolve situasaun ne’e. (Editor, Lariwa).