Dili-SMI, Prezidente Parlamentu Nasionál – PPN, Arão de Jesus Amaral, hatete PN aprova ona proposta Lei Orsamentu Jerál Estadu – OJE 2018 ne’ebé VIII Governu aprezenta ba IV lejizlatura.
“Aprova ona proposta de Lei Orsamentu Jerál do Estadu 2018 ne’ebé governu aprezenta mai I parlamentu deside ona karakter urujensia”, dehan PPN, Arão Noe ba Jornalista sira iha Uma Fukun PN, Tersa, (14/08).
PPN Arão esplika, membru PN hahú reuniaun hodi prepara ajenda hodi halo audénsia ho membru Governu inklui komisaun sira. Nia hatutan, tuir kalendáriu durante loron neen (6) halo audénsia ho komisaun hodi prepara relatóriu hodi submete ba plenária para debate iha jenéralidade durante loron rua, no loron lima (5) ba debate iha espesiálidade.
“Ohin ami komesa reuniaun para prepara agenda, komesa aban hahu audensia ho membru governu sira iha kada komisaun. Tuir kalendáriu seis dias audensia ba komisaun sira nune’e preapara relatóriu hafoin komisaun sira submete mai iha plenaria no debate iha jeneralidade durante loron rua, espesialidade durante loron lima”, tenik Arão.
Nia afirma, tuir planu maizumenus loron 10 fulan Setembru Parlamentu Nasionál enkamina ona ba Prezidente-da-Repúblika atu promulga. Maibe, deputadu husi partidu CNRT ne’e deklara katak sei iha dezáfiu boot iha debate orsamentu relasiona ho ministériu balun seidauk iha ministru rasik.
PPN ne’e mós relata preokupasaun kona-ba asuntu importante rua ne’ebé nu’udar akordu teminante ba prosesu audénsia no debate Orsamentu Jerál Estadu tinan 2018 nian hanesan to’o ohin loron seidauk iha lei organiku Governu nomós toma-de-pose ba membru Governu ne’ebé sei pendente hela. (Editor, Lariwa).