Dili-SMI, Tuir planu Komandu Jerál Falintil-Forsa Defeza Timor-Leste – F-FDTL sei promove ofisiais superior na’in tolu (3) husi postu Tenente Koronel ba postu Koronel iha loron selebrasaun aniversáriu Falintil ba dala 43 ne’ebé mosu iha loron 20 Agostu, segunda semana oin.
Ofisiais superior na’in tolu ne’ebé tama ona lista komandu F-FDTL atu hetan promosaun deviza husi postu Tenente Koronel ba postu Koronel mak hanesan Tenente Koronel, Emanuel Freitas alias Maubuti, Tenente Koronel, João Pedro da Silva alias Rai Ria no Tenente Koronel, Eugenio das Neves.
“Ami nia ofisiais superior na’in tolu (3) husi postu Tenente Koronel promove ba Koronel ne’ebé deside ona mak hanesan, Tenente Koronel Emanuel Freitas (Maubuti), João Pedro da Silva (Rai Ria) no Kapitaun Fraga Euzenio Das Neves”, dehan Prezidente Komisaun Organizadora Aniversariu loron Falintil ba dala 43, Tenente Koronel, Costantino Moreira alias Maurega, iha Kuatél Jerál F-FDTL, Fatuhada, Kinta, (16/08).
Prezidente Komisaun Organizadora mós esplika katak durante selebrasaun loron Falintil ne’ebé monu iha 20 Maiu, sei halo mós parada militár no seremonia sei prezide diretamente husi Prezidente-da-Repúblika, Francisco Guterre “Lú Olo” ne’ebé nu’udar Komandante Supremu Forsa Defeza nian.
“Loron 20 fulan Agostu sei halo parade militar no sermonia ida ne’e Prezidente-da-Repúblika mak sei prezide”, dehan Tenente Koronel, Constantino Moreira.
Tenente Koronel, Maurega, klarifika katak bázea ba diretiva Ministériu Defeza ne’ebé submete ona despasu ba Komandu Jerál F-FDTL aloka ona orsamentu hamutuk $.60 Mill ba selebrasaun loron istoriku ne’e.
“Bázeia ba diretiva Ministeru Defeza nia ne’ebé despaisu ba jenderal ho montante osan ne’ebé alokadu totál Dolar Mill Neen Nolu ($.60 mil) mak aloka ba loron selebrasaunn ida ne’e”, tenik nia.
Konvidadu hirak ne’ebé sei partisipa ka asiste seremonia aniversariu loron Falintil sei mai husi orgaun soberanu sira, sosiadade sivil, veteranu sira, familia husi veteranu matebian sira inklui komunidade iha kapitál Dili.
Antes ne’e, iha loron 7 fulan Juñu 2018, Prezidente-da-Repúblika fó promosaun ba ofisiais superior na’in hat (4) husi postu Koronel ba postu Brigadeiru Jenerál mak hanesan Koronel, Americo Ximenes alias “Sabika Bessi Kulit”, Koronel, Cornelio Ximenes alias “Maunana”, Koronel, João Miranda alias “Aluc Descartes” no Koronel, Domingos Raul alias “Falur Rate Laek”. (Editor, Mateus Barros).