Dili-SMI, Primeiru Ministru, Taur Matan Ruak, kompromete kontinua promove dialogu ho Xefe-de-Estadu, Francisco Guterres “Lú Olo” hodi rezolve polímika kona-ba kandidatu membru Governu ne’ebé to’o ohin seidauk tomada-de-posse.
“Hau kontinua koali’a nafatin ho Xefe Estadu atu buka solusaun, hau espera katak tempu oin mai bele hetan solusaun”. Dehan Xefe-de-Governu, Taur Matan Ruak, iha Palasiu Prezidensial Aitarak-Laran, Kinta, (16/08) hafoin hasoru malu Prezidente-da-Repúblika.
Taur haktuir, antes ne’e Prezidente-da-Repúblika liu husi Dekretu Prezidensial aprova ona kandidatu na’in tolu atu tomada-de-posse, maibe kandidatu na’in tolu ne’e rasik halo pedidu hodi adianta ba simu pose tamba sei hein sira seluk ne’ebé pendente hela.
“Sira mantein solidariedade ba sira ne’ebe sidauk toma pose, tamba ne’e mak sira la simu pose ohin ita hein katak tempu seluk sira sei simu tomada-de posse”, dehan Taur.
Bázeia ba karta ofisiál husi gabinete Prezidente-da-Repúblika ne’ebé diriji ba Primeiru Ministru, Taur Matan Ruak, iha loron 13 Agostu, Prezidente konkorda ona atu fó tomada-de-posse membru governu nain tolu hanesan Alfredo Pires, ba Ministru Petróleu no Rekursu Mineral -MPRM, Samuel Marçal, ba Ministru Planeamentu no Investimentu Estratejiku - MPIE, no Rogério Araújo, Mendonça ba Sekretariu Estadu Peskas – SEP.
Maibe, liu loron rua, iha loron 15 Agostu, lider VIII Governu Konstitusionál, Taur Matan Ruak haruka fali karta ofisiál ba PR hodi kansela tomada-de-posse datoluk ba membru Governu na’in tolu ne’ebé PR aprova ona.
Tuir surat ofisiál husi gabinete PM ho data 15 Agostu 2018 ne’ebé SMI asesu, Governu informa ba PR kona-ba desizaun Governu hodi kansela tomada-de-posse ho razaun seidauk halo ajenda ba toma posse membru Governu na’in tolu ne’e.
Alfredo Pires, hanesan kandidatu membru Governu ne’ebé sei okupa kargu Ministru Petróleu no Rekursu Mineral – MPRM, ba www.tempotimor.com iha loron 15 Agostu katak hanesan partidu nia ema sei kumpri desizaun ka orientasaun husi partidu nian karik iha kanselamentu ba ninia tomada-de-posse.
“Ha’u rona de’it katak kanseladu tiha ona, no ha’u halo tuir de’it liña orientasaun partidu nian,” dehan Alfredo Pires ba Tempo Timor.
Tuir observasaun SMI, durante ne’e asuntu tomada-de-posse ba kandidatu membru foun ba VIII Governu konstitusional durante ne’e sai polímika boot iha sosiadade timorense. (Editor, Lariwa).