Dili-SMI, Xefe-de-Estadu, Francisco Guterres “Lú Olo” husu ba veteranu no veterana sira atu kontinua hamutuk hodi tane ás valor sira rejisténsia nian no kaer liman hamutuk hodi kompleta libertasaun nasionál liu husi hasai povu husi mukit no kiak.
Tuir nia, veteranu sira nia responsabilidade ba liberta patria hetan ona rezultadu, presiza kontinua serbisu hamutuk hodi liberta povu husi hamlha no mukit
“Ita liberta ona ita nia patria maibé ita sedauk liberta povu, ita hatene katak ita nia povu barak sei moris iha kiak no mukit nia laran”, dehan Lú Olo, liu husi nia diskursu ba loron anviersariu FALINTIL ba dala 43, iha Kuartel Jerál Fatuhada, Segunda, (20/08).
Atúal Prezidente-da-Repúblika ne’e mós kestiona katak nasaun ne’e liu ona tinan sanolu resin lima hetan ninia independensia maibe povu seidauk hetan benefisiu husi ukun-an ida ne’e.
Partidu polítiku sira iha eleisaun jerál halo promesa barak hodi husu ba povu vota ba partidu atu bele manan no ukun, maibe povu kontinua tuur iha uma at, povu nia oan sira kontinua labele asesu ba edukasaun tanba laiha finanseiru.
“Iha tinan sanulu resin ita restaura ita nia independensia. Tinan lima-lima ita husu ba povu atu vota ba ita nafatin maibé sira kiak nafatin, sira tur iha sira nia uma okos bainhira udan tau sira tenke muda sira nia sasan ba mai iha sira nia uma laran tamba udan ben tama, sira nia oan sira labele ba eskola tamba mukit no kiak laiha kbi’it atu selu sira nia oan nia eskola”, tenik Komandante Supremu Forsa Defeza ne’e.
Nia mós preokupa ho atetude sidadaun ne’ebé iha tempu ukun rasikán hahu la respeitu lider nasaun hodi insulta no tolok, maske lider sira ne’e fó vida tomak ba funu hodi liberta povu no nasaun ida ne’e.
“Bele loron manas, malirin maibé ita nia lider sira iha dignidade, bele kaer no diriji funu ida ne’e to’o remata maibé iha tempu ukun rasikán ema foin tolok no hatun ita nia lider sira”, dehan eis Prezidente Parlamentu Nasional primeiru lejizlatura ne’e.
Seremonia selebrasaun loron FALINTIL ba dala 43 ne’e partisipa husi atúal Primeiru Ministru, Taur Matan Rual, Tribunal rekursu, Prezidente Parlamentu Nasional, membru governu no korpu diplomatiku sira. (Editor, Lariwa).