Dili-SMI, Tinan ida ne’e, Sekretáriu Estadu Komunikasaun Sosiál – SEKOMS propoin orsamentu hamutuk Millaun Tolu Nolu pontu Ualu Nolu Resin Tolu ($.3.83 milaun) ba saláriu vensimentu, bens servisus no transferensia públiku hodi garante makina Estadu durante fulan 4 nia laran.
Sekretáriu Estadu Komunikasaun Sosiál, Mericio Juvinal Dos Reis Akara, husi totál ne’ebé propoin maioria aloka ba RTTL-ep, gabinete SEKOMS, Ajensia TATOLI no restu ba Rádiu Komunidade sira hodi selu saláriu, bens servisu no transferensia públiku nian.
“Hau bele dehan katak maioria sei ba RTTL-EP kuaze millaun ida pontu rua ($ 1.2 mil), ba saláriu vensimentu SEKOMS nian ho orsamentu hamutuk $.854 milaun, Agensia TATOLI ita aloka hamutuk $.25 mil, restu sei ba Rádiu Komunidade sira, ami aloka hotu ona, ba saláriu vensimentu, bens servisu, transferensia públiku”. Dehan Mericio Akara ba Jornalista sira iha Palásiu Governu, Tersa, (21/08).
Akara haktuir, Parlamentu Nasionál kestiona kapasidade ezekusaun orsamentu durante fulan hat, maibe SEKOMS afirma katak iha kapasidade hodi ezekuta tanba alokasaun orsamentu hirak ne’e bázea ba nesesidade.
“Ita aloka hotu ona, tamba ne’e mak membru parlamentu sira husu bele ezekuta ka la’e fulan hat, ne’e mak ami dehan bele tamba alokasaun orsamentu bázea ba nesesidade fulan hat nian, ami hanoin ne’e rasionál I ita sei ezekuta iha fulan hat nia laran”.
SEKOMS mós informa planu futuru gradualmente sei harii tan estasaun Rádiu Komunidade tolu (3) iha munisipíu maibe seidauk klaru bainhira mak establese. Nune’e mós, sei kontinua mantein fó subsidiu ba Rádiu Komunidade sira.
Ikus liu, SEKOMS afirma husi totál orsamentu hamutuk $.3.83 Milaun ne’ebé propoin, sei uza fundu transferensia públika atu apoiu dezenvolve mídia privadu sira hodi bele halo publikasaun kona-ba programa Governu nian. (Editor, Mateus Barros).