Dili-SMI,Deputadu V Lejizlatura iha Parlamentu Nasionál sujere Governu presiza harii estatua saudozo eis Sekretáriu Jerál Nasoens ONU, Kofi Annan iha Timor-Leste hodi sai nu’udar istória ba jerasaun foun tanba matebian sai mós autor importante ba luta libertasaun nasionál.
“Hau sekunda ida ne’e, sei posivel halo mos estatua tamba hau hanoin eis Sekretáriu jeral ne’e mós reprezenta mundu ida toma organizasaun nivél altu iha mundu tomak, aliende de esforsu, nia mós asiste direitamente ita nia resturasaun independensia”, dehan deputadu Antonino Bianco, ba jornalista sira iha uma fukun PN, Kinta,(23/08).
Deputadu husi Bankada FRETILIN ne’e fó agradesementu ba saudozo Kofi Annan ninia luta naruk hodi lori problema Timor-Leste ba ukun rasikán.
“Agradese ba ita nia saudozu Kofi Annan tamba luta ida naruk Sekretáiu Jerál troka ba mai, só uniku Sekretáriu Jerál ida ne’e mak nia konsege fó opsaun rua ba Timor-Leste hodi ukun rasikán”, dehan nia.
Iha parte seluk, deputada Lidia Norberta senti triste tanba PN foin mak halo aprovasaun ba votus apezar ba saudozu Konfi Annan, maske saudozu rasik mate iha sabádu semana kotuk.
“Ami nia observasaun relasiona ho ezizensia husi nota de pezar ne’e ba tempu ne’ebé mak agora, ita iha dadauk ohin kinta feira, Kofi Annan mate iha loron sabadu dia 18 de Agostu, ami sente triste mesmu ke ita aprova ida ne’e”, dehan Lidia.
Kofi Annan rasik mate iha Ospitál Bern, Swiss, nasaun ida ne’e matebian hela ona durante tinan hira nia laran.
Sekretáriu Jerál ONU ba dala 7 ne’e nia mate, Prezidente Ghana, Nana Akufo-Addo deside nasaun halo dezlutu nasionál durante semana ida nu’udar asaun homenajen ba matebian Kofi Anan. (Editor, Mateus Barros).
