Dili-SMI, VIII Governu Konstitusionál kansela inagurasaun ponte Comoro III ne’ebé ajenda ona ba loron ohin Tersa (04/09)) no muda ba loron segunda (10/09) ho razaun tanba maioria membru Governu tuir hela debate Orsamentu Jerál Estadu – OJE 2018 ne’ebé laiha tempu atu asiste seremonia inagurasaun refere.
“Ami hasai ona konvite hodi halo termu intrega aban (04/09) dader tuku 09:30, maibé ha’u orienta ona ha’u-nia Vise Ministru para atu tenta took hadi’a ba Segunda oin, tanba, diskusaun orsamentu, no ministru labele partisipa”, dehan Ministru Obras Públikas – MOP, Salvador Eugénio Pires, liu husi komunikadu imprensa ne’ebé SMI asesu, Tersa, (04/09).
MOP konfirma katak inagurasaun ponte Comoro III sei entrega ofisiálmente hosi Governu Japaun ba Governu Timor-Leste hodi loke ba públiku hodi fasilita movimentu transporte públiku no komunidade iha kapitál Dili.
Ministru Salvador esplika, konstrusaun ponte Comoro III ne’e hetan apoiu fundu hosi Governu Japaun liuhosi Ajeénsia Internasionál JICA ho montante orsamentu hamutuk $. 16.171 Milloens.
“Konstrusaun ponte Comoro III ne’e hetan apoiu orsamentu hosi Governu Japaun liuhosi ajénsia Kooperasaun Japaun nian ba Kooperasaun Internasionál (JICA) ho orsamentu Japaun nian montante, ¥ 1.690.000.000,00 (Yen Japaun), orsamentu dollar Amerikanu nian hamutuk US $ 16.171.610,00 ka millaun 16, 171”, katak Salvador.
Salvador klarifika, projetu konstrusaun ponte Comoro III ne’e ho durasaun tinan rua (2) ne’ebé hahu iha loron 4 Juñu 2016 to’o loron 31 Augostu 2018.
Periodu kontratu ba konstrusaun ponte Kumoro III ne’ebé lokaliza iha aldeia Fomentu II, suku Kumoro, postu administrativu Don-Aleixo, munisípiu Dili, hahu husi loron 4 fulan-Junu 2016 to’o loron 31 fulan-Agostu tinan 2018”, dehan nia.
Ponte Comoro III ninia medida naruk metru 250 ho medida luan metru 11.50 no parte estrada ho ninia naruk 3.2 kilometru no luan ho metru 14.
“Ponte nia naruk ho luan mak 250 metru + 11.50 metru, no estrada nia naruk ho luan mak 3.2 Kilometru + 14 metru, no kona-ba tipu ponte ne’e mak PC Box Grider Bridg”, tenik MOP.
Ministru hatutan, projetu ponte Comoro III ne’e importante tebes tanba bele ajuda movimentu iha kapitál Dili, liuliu ligasaun ba Aeroportu Internasionál Nicolau Lobato husi parte Weste ho Leste.
Konstrusaun ponte Comoro kaer hosi kompañia konsultan Nippon Engineering Consultants Co. Ltd and Idea Consultans,Inc, e Contractor Tobishima Corporation. (Editor, Lariwa).
