Dili-SMI, Komandante Jerál Falintil-Forsa Defeza Timor Leste – F-FDTL, Maijor Jenerál, Lere Anan Timur, hatete mílitar laiha divida ne’ebé atu selu ho Orsamentu Jerál Estadu – OJE 2018, maibe presiza osan ba nesesidade instituisaun nian.
“Ami laiha divida atu selu divida, agora ami hein orsamentu atu mai atende nesesidade forsa armadas nian”, dehan, Lere Anan, iha Palasiu Prezidensiál Aitarak-Laran, Kuarta, (05/09).
Tuir Lere Anan, karik dotasaun orsamentu ba OJE 2018 ne’ebé dadaun aloka ba instituisaun F-FDTL ne’e sei fó preoridade ba sosa matérial militar, infra-estrutura, fasilidade no seluk tan hodi apoiu serbisu instituisaun militar nian.
“Ami hein orsamentu atu mai atende nesesidade forsa armada sira nian liu-liu iha matérial gerra, infra estrutura no buat oin-oin ne’ebé ami presiza”, katak Jeneral fitun rua ne’e.
Relasaun ho pergunta jornalista kona-ba manutensaun Portu Naval Hera, eis komandante Falintil hosi rejiaun Ponta Leste esplika latama planu ba OJE 2018 nian.
Maibe, nia hatutan, Ministru Defeza no Seguransa sei konsidera ba planu manutensaun portu Naval Hera ne’ebé sira diskute ona antes ne’e.
“Ita koalia kona-ba Portu Hera agora osan mós laiha agora atu halo manutensaun oinsa, maibé hanoin katak ami nia ministru defeza sei fo prioridade ba buat sira ne’ebe uluk nia sei hau nia vise ne’e ami diskute, agora mak nia atu mai tau iha pratika atu implementa buat sira ne’ebe uluk ami hanoin”, tenik nia.
Dotasaun OJE 2018 ne’ebé aloka ba instituisaun F-FDTL hamutuk Rihun Atus Lima Dollar Amerikanu ($. 0.5 milloens)hodi selu subsidiu pendente sira no pagamentu adisionál seluk ne’ebé iha relasaun ho eleisaun jerál foin lalais ne’e. (Editor, Mateus Barros).
