Dili-SMI, Membru Parlamentu Nasionál hosi partidu opozisaun hanesan FRETILIN no PD husu VIII Governu atu hadi’a mekanizmu selu orsamentu idozus nian hodi labele prejudika ba ferik-katuas wainhira simu sira nia diretu idozus nian.
Deputadu Mariano “Asanami” Sabino esplika, apela ba Governu liu hosi Primeiru Ministru atu hadi’a mekanizmu hodi trata ferik-katuas wainhira simu ninia osan ho kondisaun ne’ebé justu la’os ho prosesu sira ne’ebé la adekuadu.
“Orsamentu ne’ebé mak ita aprova atu bele rezolve liu tan, ita tenki hadi’a mekanizmu para timor-oan hotu goja iha rai ida ne’e ho dignu. Ferik katuas sira tenki simu ona osan iha sira nia fatin la’os mai antri iha fatin-fatin”, dehan Mariano Sabino, liu hosi deklasaun votu hafoin vota orsamentu globál finál OJE tinan 2018 iha Parlamentu Nasionál, Sesta, (07/09).
Eis Ministru Agrikultor ne’e afirma, PD nu’udar jerasaun kontinuador prontu apoiu Primeiru Ministru, Taur Matan Ruak hanesan lider Governu, guireleiru nomós lider nasionál atu hadi’a povu nia moris.
Parte seluk, iha loron Kinta, (06/09), deputadu Adriano do Nascimento mós kestiona kapasidade Governu relasiona mekanizmu simu orsan idozus ne’ebé dook hosi residensia ferik-katuas nian ne’ebé fó impaktu boot ba ema idozus sira.
“Foin lalais iha munisipiu Covalima, katuas idozus ida mate iha dalan tanba deit atu ba simu ninia orsan iha banku. Governu presiza hadi’a no kria mekanizmu diak atu nune’e labele fó impaktu ba ferik-kataus sira”, dehan Adriano iha PN.
Nia relata, foin dadauk ne’e katuas ida iha Munisipíu Covalima mate iha mota-laran wainhira hala’o viajen hosi ninia knua ba kapitál Covalima hodi simu orsan iha Banku. Ho nune’e, nia sujere ba VIII Governu atu kordena ho banku hodi uza kareta lori orsan ferik-katuas ba sira hela fatin hodi simu, nune’e bele minimiza mosu dezastre boot ba ferik-katuas sira.
Nune’e mós, deputadu partidu opozisaun FRETILIN, Aniceto Guterres, liu hosi deklarasaun votu kestiona mós kona-ba mekanizmu Governu selu idozus ne’ebé la diak. Nune’e, nia rekomenda ba VIII Governu kria mekanizmu adekuadu relasiona ho prosesu atendementu ka selu idozus iha rai-laran.
Antes ne’e, iha loron Segunda, (03/09) joven ida iha Munisipiu Ermera Hulan ninia inan hosi ninia rezidensia ba simu osan idozus iha Banku BNCTL. Akontesementu joven hulan nia inan ne’e sai viral iha mídia sosiál wainhira komunidade Ermera ho IF Facebook Che Maubere públika iha nia pajína FB.
Che Maubere hakerek iha nia pajina FB sujere ba Governu atu kria polítika diak ne’ebé bele fasilita idozus sira iha futuru wainhira simu sira nia diretu idozus nian.
“Hanesan sidadaun sujere ba Governu bele hadi’a polítika ne’ebé mak diak atu nune’e bele fasilita idozus sira diak liu iha futuru”, dehan Che Maubere iha nia pajína facebook. (Editor, Lariwa).
