Dili-SMI, Estadu Portugal liu hosi kooperasaun defeza sei kontinua kapasita membru FALINTIL-Forsa Defeza Timor-Leste – F-FDTL liu hosi formasaun akademíku aero nian hodi nune’e bele garante seguransa iha futuru.
Komitmentu apoiu Estadu Portugal liu hosi kooperasaun milítar ne’e, diretamente hato’o hosi Adidu Defeza Portugal iha Timor-Leste, Coronel, Delfim Zambujo das Dores ba Ministru Defeza no Seguransa, Filomeno Paixão, iha
Ministru Defeza no Seguransa, Filomeno Paixão, konsidera formasaun akademiku ba membru F-FDTL komponente Aero ne’e importante tebes tanba bele hasa’e kapasidade rekursu umanu hodi bele asegura soberania nasionál iha futuru.
“Aseita tebes tanba ne’e importante hodi kapasita kuiñesementu forsa Timor-Leste nune’e mós aumenta rekursu humanu ba iha área refere”, dehan Filomeno, liuhosi Komunikadu Imprensa ne’ebé SMI Asesu, Tersa, (11/09).
Tuir eis Brigadeiru Jenerál, objetivu hosi formasaun akademiku Aero nian ne’e atu prepara rekursu umanu instituisaun milítar hodi bele asegura nasaun no povu hosi ameasa iha futuru oin mai.
Paixão esplika katak formasaun akademiku iha Aero ne’e tuir pakote hanesan formasaun pilotu, ofisiál tekniku, mekániku no enjineria nian.
“Formasaun ne’e tuir pakote, katak iha formasaun ida inklui pilotu, engineria, ofisiais tékniku no mekániku”, katak nia.
Eis Vise Komandate Jerál F-FDTL ne’e mós esplika, tuir planu formasaun akademiku ne’e sei hahu iha tinan 2019 durante fulan 6 nian laran.
Iha tinan 2016, instituisaun F-FDTL liuhosi Xefe Estadu Maior Jenerál F-FDTL, Major Jeneral Lere Anan Timur, asina ona nota intendementu bilaterál ho Jenerál Forsa Armada Filipina, Ricardo R Visaya, iha Hotel Borobudur – Indonézia kona-ba formasaun pilotazen membru F-FDTL iha nasaun Filipina.
No, iha loron 25 fulan Maiu tinan 2018, VII Governu lansa ona Aviaun Patrullamentu Aero F-FDTL ho modelu Sestas 172P ne’ebé oferese hosi Kompañia Aero Dili hodi uza ba kontrola tasi Timor nian. (Editor, Lariwa)