Ha Noi-SMI, Governu Ha Noi liuhosi Ministru Negósiu Estranjeiru Repúblika Sosialista Vietanme – MNE-SV, Pham Binh Minh, hakarak halo akordu bilaterál ida ho Governu Timor-Leste hodi oferese formasaun lingúa-Vetname ba membru Falintil-Forsa Defeza Timor Leste – F-FDTL iha futuru.
“Governu Vietname hakarak halo akordu ida ho Governu Timor-Leste atu oferese kursu lian-Vietname ba trópas Timor-oan iha area Defeza”, dehan Pham Binh Minh, iha Kuarta, (12/09), wainhira enkontru bilaterál ho Ministru Negósiu Estranjeiru no Koperasaun, Dionisio Babo, iha Ha Noi – Vetname ne’ebé públika iha pajína ofisiál MNEK nian.
Durante hasoru malu, MNE Pham Binh, hato’o interese Governu Vietname atu apoiu Governu Timor-Leste iha area importante rua mak hanesan agrikultura ho peska nian.
“Hakarak halo akordu ida ho Governu Timor-Leste iha area agrikultura ho peska”, dehan Pham.
Iha parte seluk, Ministru Negósiu Estranjeiru no Koperasaun Timor-Leste, Dionisio Babo, hatete, enkontru bilateral ne’e atu hametin diak liu tan relasaun entre Estadu rai rua ne’e.
Liuhosi enkontru bilateral ne’e, Dionisio hato’o apresiasaun ka kongratula Governu Vietname ne’ebé sai uma na’in ba Forum Ekonómiku Mundiál ne’ebé Timor-Leste mós hetan konvite hodi partisipa.
“Reprezenta Governu Timor-Leste, hato’o kumprimentus no kongratula Vietnam ne’ebé sai uma na’in ba FEM no partisipasaun iha ASIAN Games 2018”, dehan Dionisio Babo.
Iha momentu ekontru formal entre reprezentante Governu nasaun rua ne’e, MNEK, Dionisio Babo ofisiálmente konvida ninia omólugu MNE Vietname atu vizita ofisiál mai Timor-Leste iha futuru.
Enkontru bilaterál entre partisipa mós Embasadora Timor-Leste ba Vietname, Pascoela Barreto ho delegasaun ho delegasaun MNEK Timor-Leste nian. (Editor, Lariwa).