Dili-SMI, Polítika sosa prado foun ba membru V Lejizlatura to’o ohin kontinua sai polímika iha públiku relasiona ho informasaun ne’ebé la hanesan mai hosi lider Parlamentu Nasionál – PN no Sekretáriu Jerál PN nian.
Sekretáriu Jerál PN, Adelino Afonso de Jesus, hatete, PN iha planu atu sosa prado foun ba deputadu V lejizlatura iha tinan 2019.
Adelino, esplika, planu sosa kareta foun ne’e feitu ona no hein halo ezekusaun maibe la’os iha tinan 2018 tanba presiza prosesu tenderizasaun ho durasaun fulan tolu (3) ne’ebé hadi’a sosa kareta foun ba tinan 2019.
“Planu ne’e iha ona, so que iha tinan 2018 ne’e labele tamba ninia ezekusaun ne’e tempu badak demais, no ninia prosesu tenderizasaun ne’e lori kuaze fulan tolu kedas tantu fiksu koloka ba iha tinan 2019”, dehan Adelino Afonso, iha Uma Fukun PN, Sesta, (14/09).
Adelino, klarifika katak, kona-ba sosa kareta marka pajero ka prado ne’e sei hein desizaun hosi Konsellu Administrasaun nian, antes loke konkursu hodi sosa kareta refere.
“Marka hau seidauk bele determina tamba ohin sei koloka tan kestaun ida oinsa mak Konsellu Administrasaun ho nia dezisaun determina marka ne’e A ka B ba kareta para atu bele konkoreta, loos, labele hosi sekretáriadu mesak mak determina dehan kareta ne’e marka pazero ka prado”, tenik nia.
Maibe, Prezidente PN, Arão Noe, ba jornalista sira iha Segunda, (10/09) esplika PN la preve orsamentu atu sosa kareta foun ba deputadu V lejizlatura nian iha OJE 2018. No, Konsellu Administrasaun deside ona atu rekolla kareta prado tuan hosi III Lejizlatura hodi uza ba atividade parlamentar nian.
Arão Noe, hatutan, parte Konsellu Administrasaun PN haruka ona karta dahruak ba eis deputadu sira atu entrega kareta prado refere. Wainhira la entrega mak sei lori polísia atu foti kareta hosi eis deputadu III Lejizlatura nian.
“Se karta terseiru ba tan mak eis deputadu sira laentrega sei iha dalan rua ami atu halo, lori prosesu judisiál i bele lori polísia foti asaun”, dehan Arão Noe.
Entretantu, iha loron 25 fulan Juñu, Vise I Prezidente PN, Maria Angela Sarmento, defende sosa kareta foun ba deputadu no deputada V lejizlatura ho razaun atu fasilita serbisu lejizlador sira nian.
“Deputadus sira ne’ebé mak mai serbisu iha parlamentu sira presiza fasilidade atu bele fasilita sira nia serbisu, babain ita nia sosiadade sira haree deputadus sira mai ho kareta prado, maibe ba deputadu sira la’os marka mak importante”, dehan Maria Angela Sarmento.
Durante ne’e, Movimentu Universitáriu Timor-Leste – MUTL, Sosiadade Sivil no públiku iha rai-laran la konkorda ho polítika sosa kareta foun ba membru V lejizlatura nian. (Editor, Lariwa).