Dili-SMI, Primeiru Ministru VIII Governu Konstitusionál, Taur Matan Ruak ho nia membru Governu sira preokupa ho proposta lei Orsamentu Jerál Estadu – OJE 2018 ne’ebé to’o ohin loron seidauk hetan promúlga hosi Prezidente-da-Repúblika.
PM Taur Matan Ruak, iha semana kotuk, Kinta, (13/08) hafoin remata enkontru ho Prezidente-da-Repúblika, Francisco Guterres “Lú Olo”, afirma, karik la promúlga OJE 2018 ho lalais mak Governu sei hetan krize finanseiru iha fulan Setembru tinan ida ne’e.
“Situasaun kritíka oituan iha fulan Setembru kona-ba ita nia rekursu finanseiru entaun depende maka’as loos ba promúlgasaun orsamentu ne’ebé foin parlamentu aprova”, dehan Taur.
Ho nune’e, Taur rasik husu ba Xefe-de-Estadu atu bele aprova lalais hodi nune’e bele asegura funsionamentu makina estadu nian.
“Hau mós husu karik nia (OJE 2018) promúlgasaun lalais diak liu”, tenik Xefe Governu ne’e.
Tuir nia, urjensía hosi promúlgasaun ne’e 2018 ne’e importante tebes tanba atu apoiu ba atividade makina Estadu nian.
Iha biban ketak, Ministru Reforma Legizlativa ba Asuntu Parlamentar, Fidelis Leite Magalhães, mós preokupa kona-ba OJE 2018 ne’ebé seidauk hetan promúlgasaun hosi Xefe-de-Estadu.
“OJE ba tinan 2018 ne’e governu propoin I parlamentu aprova ona. Dadaun ne’e iha hela palásiu prezidensial Aitarak Laran. Ita hein hela, bainhira mak atu bele halo promulgasaun para hodi finansia atividade Estadu nian”, katak Fidelis ba jornalista sira, Sesta, (14/09), iha Parlamentu Nasionál.
Tuir Fidelis, aprovasaun OJE 2018 ne’ebé tarde fó implikasaun Governu no Estadu labele halo anúnsiu atividade Governu nian.
“Implikasaun rua hosi governu ho Estadu nian atu anunsia atividade Estadu presiza orsamentu Estadu ida maibe to’o agora seidauk hetan promulgasaun orsamentu nian rasik hein katak iha tempu badak sei promulga para bele finansia ba makina Estadu”, dehan nia.
Iha parte seluk, Xefe Kasa Sivil, Francisco Maria Vasconselhos, iha loron, Tersa, (11/09) klárifika ba públiku katak proposta lei OJE 2018 tama ona iha meja Prezidente-da-Repúblika antes atu halo promúlgasaun.
Tuir Lei Xefe-de-Estadu iha loron tolu nolu atu halo estuda ba proposta lei OJE 2018 antes halo promúlgasaun ka veta.
Proposta lei OJE 2018 nú 2/V (2) ne’e parte Parlamentu Nasionál - PN submete ona ba gabinete Prezidénsia-da-Repúblika iha loron segunda, (10/09) semana kotuk. (Editor, Lariwa).