Díli-SMI, Prezidente Parlamentu Nasionál – PPN, Arão Noe Amaral, haktuir Xefe-de-Estadu, Francisco Guterres “Lú Olo” nia liafuan katak PN iha diretu tomak hodi vota kontra kona-ba viajen prezidente ba estranjeiru tuir kompeténsia ne’ebé lei fó ba orgaun soberania ida-idak nian.
“Parlamentu Nasional la autóriza viajen prezidente ba iha estraneiru ne’e desizaun parlamentu nian, tamba orgaun ida-idak nia kompeténsia rasik tuir konstituisaun”, dehan Prezidente-da-Repúblika ne’ebé haktuir hosi PPN, Arão Noe, ba jornalista sira hafoin enkontru semanál ho Prezidente-da-Repúblika, iha Palásiu Prezidensiál Aitarak-Laran, Kuarta, (19/09).
Arão Noe mós afirma, nia rasik mós vota kontra viajen prezidente Estadu Unidus da Amerika tanba presiza asegura polítika bloku no submete ba orientasaun polítika bloku nian.
“Labele dehan hau ba tiha prezidente parlamentu, hau ema ida independente hosi bloku ka hosi partidu ne’e prezensaun ne’e sala, hau tenke submete mesmu prezidente parlamentu hau tenke submete ba disiplina partidaria ne’ebé regulariza iha lei eleitorál”, dehan nian.
Nia hatutan, durante enkontru ho Xefe-de-Estadu relata kona-ba rezultadu votasaun iha PN ne’ebé la autoriza presidente atu halo viajen ba rai-liur.
Nune’e mós, nia esplika, PN sei diskute pedidu pakote viajen prezidente ba estranjeiru to’o fulan Dezembru 2018, tanba presiza PN aprova rezolusaun ba kada dezlokasaun Xefe-de-Estadu ba estranjeiru.
“Pedidu prezidente nian empakote viajen ba estrangeiru nian to’o dezembru, ami sei diskuti aprova rezolusaun ida-idak ba kada vizita tamba aut’orizasaun dezlokasaun sentimentu ida tenke ho rezolusaun ida, ami tenki halo rezolusaun ida por ida ba kada vizita, ita nia sistema legál atu konsentimentu dezlokasaun Prezidente Repúblika nian”, Tenik Arão Noe.
Pedidu vizita traballu Xefe-de-Estadu ba estranjeiru la pasa iha PN tanba maioria deputadu vota kontra, rezultadu vota kontra hamutuk 33, vota a favor 25 no abstensaun 0.
Antes ne’e, iha fulan Jullu, PN mós vota kontra viajen Prezidente-da-Repúblika ba nasaun Portugal ho vota kontra hamutuk 35 no vota a favor hamutuk 29. (Editor, Lariwa).
