Dili-SMI, Maizumenus timoroan hamutuk ema na’in 60-resin ne’ebé dadaun ne’e kontinua hala’o estudu iha nasaun Cuba ne’ebé kompostu hosi ema na’in 36 halo estudu iha area espesiálista medisina no ema na’in 25 estuda iha area pedagójika.
“Situsaun estudante timoroan ne’ebé hala’o estudu iha Cuba, sira iha disiplina no desempeñu di’ak. Oras ne’e, timoroan na’in 36 mak estuda iha area espesialista medisina no nain 25 estuda iha area Pedagójika”, dehan Embasador Timor-Leste iha Cuba, Loro Horta, hafoin hasoru malu ho Prezidente-da-Repúblika, Segunda, (24/09) iha Palásiu Prezidensiál Aitarak-Laran.
Loro Horta, informa, durante enkontru, husu ba Prezidente-da-Repúblika atu diversifika kooperasaun ho Cuba, atu bele aumenta area sira ne’ebé Timor sei falta hanesan espesialista medisina iha area radiolojista , farmasia, tekníku laboratóriu no ha area seluktan ne’ebé Timor-Leste presiza atu dezenvolve.
Loro, hatutan, esplika mós situasaun polítika iha Cuba liu-liu kona-ba Governu halo ona tranzisaun ba jerasaun tuan sira (jerasaun ne’ebé uluk halo funu hasoru ditadura Baptista) ne’ebé sei retira iha fulan Setembru tinan 2018.
“Relasiona ho situasaun polítiku Cuba nian, oras ne’e daudaun, iha Prezidente Repúblika Cuba, Miguel Díaz- Canel nia mandatu, Governu Cubano halo ona tranzisaun ba jerasaun sira ne’ebé mak uluk halo funu hasoru ditadura Baptista hodi retira husi sena polítíka no iha loron-15 fulan-Novembru tinan ida ne’e, sei iha debate kona-ba referendum ba Konstituisaun foun”, dehan Loro Horta.
Embasador ne’e mós haktuir, Xefe-de-Estadu no atúal Komandante Supremu Forsa Armada ne’e apresia polítika tranzisaun jerasionál ne’ebé Governu Cubano atu implementa. Nomós apresia serbisu Embasador Loro Horta ne’ebé durante hala’o iha rai refere.
Tuir planu, iha posibilidade Vise-Prezidente-da-Repúblika no Ministru Negósiu Estranjeiru Cuba sei hala’o vizita traballu mai Timor-Leste iha tinan 2019.
“Iha posibilidade tinan-2019, Vise Prezidente-da-Repúblika ho Ministru Negósiu Estranjeiru Cuba sei halo vizita mai iha Timor-Leste”, dehan Loro Horta.
Kooperasaun Governu Timor-Leste ho Cuba hahu establese iha Governasaun anterior (Governu FRETILIN) iha ne’ebé haruka timoroan lubuk-ida hodi hala’o estuda iha area medisina iha Cuba ho gratuita. (Editor, Lariwa).
