Díli-SMI, Inisiu fulan Outobru tinan ida ne’e, Timor-Leste sei lidera konfrensia rejionál entre Ministériu Edukasaun iha ASEAN ne’ebé bolu “Southeast Asian Ministers of Education Organization – SEAMEO” hodi avalia kona-ba progresu no dezafiu iha area Edukasaun nian.
“Konferénsia rejionál ida ne’e atu halo avaliasaun ida kona-ba area edukasaun nian atu haree identifika difikuldades ne’ebé mak membrus SEAMEO ne’e iha”, dehan Embasador Timor-Leste ba Filipina, Jose Gaspar Piedade, Tersa, (25/09) hafoin hasoru malu ho Xefe-de-Estadu, Francisco Guterres “Lú Olo” iha palásiu prezidensiál Aitarak-Laran.
Durante enkontru, Embasador Jose Gaspar relata situasaun atúal kona-ba estudante timoroan ne’ebé dadaun hala’o hela estudu iha nasaun Filipina.
Diplomata ne’e esplika, maizumenus estduante ho pursentu 70 mak hala’o sira nia estudu iha area Engeneria Konstrusaun Sivil, IT no Agrikultura. Maizumenus pursentu 5 to’o 6 mak estuda kona-ba siénsia sosiál hanesan teolójia no filosófia.
“Iha estudantes kuaze pursentu hitu nulu (70%) mak hola parte liu ba Engenaria Konstrusaun Sivil, IT, Agrikultura, no pursentu lima to’o ne’en (5%-6%) mak halai liu ba iha siensia sosiais hanesan teologia no filosofia”, tenik nia.
Embasador ne’e esplika, dadaun ne’e totál estudante hamutuk ema na’in 280 ne’ebé mak rejista iha embasada TL iha Filipina. Inklui estudante hamutuk ema na’in 35 ne’ebé hetan bolsu estudu hosi Governu Filipina.
Nia hatutan, parte Embasada mós halo liña koordenasaun ho migrasaun Filipina, wainhira estudante ne’ebé hetan nota ladiak sei la hanaruk vistu no automatikamente sira tenke fila mai Timor-Leste.
“Ita iha totál 35 bolseiros agora, hamutuk hotu 280 estudantes ne’ebé mak agora iha ne’eba, tuir dadus ne’ebé mak rejistadu iha embaisada.Iha koordenasaun ho servisu imigrasaun Filipinas ninian i estudantes sira ne’ebé mak tuir sira nia notas la diak automatikamente viza ne’e imigrasaun la prolonga (perpanjang) entaun sira sei fila fali mai iha Timor”, katak Gaspar.
The Southeast Asian Ministers of Education Organization – SEAMEO nu’udar organizasaun rejionál entre Governu iha Sudeste Aziatiku ne’ebé establese iha tinan 1965 hodi promove kooperasaun rejionál iha area Edukasaun, Siensia no kultura.
Nasaun Timor-Leste rasik sai membru permanente ba organizasaun SEAMEO hahu iha tinan 2006. (Editor, Lariwa).